अमेरिकी सरकारले अब औपचारिक रूपमा विश्व एड्स दिवस नमनाउने

नेपाल हेल्थ न्युज, काठमाडौं । सन् १९८८ पछि पहिलो पटक अमेरिकी सरकारले अब विश्व एड्स दिवसलाई औपचारिक रूपमा नमनाउने भएको छ।

अमेरिकी विदेश मन्त्रालयले आफ्ना कर्मचारीहरू तथा अनुदान प्राप्त संस्थाहरूलाई डिसेम्बर १ को दिन आयोजना हुने कार्यक्रमका लागि सरकारी कोष प्रयोग नगर्न र सार्वजनिक रूपमा प्रचार–प्रसार नगर्न निर्देशन दिएको छ।

यो निर्णयबारेको जानकारी पत्रकार एमिली बासले पहिलो पटक सार्वजनिक गरेकी थिइन् भने पछि न्यूयोर्क टाइम्स ले हेरेको एक सरकारी इमेल मार्फत यसको पुष्टि गरेको हो।

सो इमेलमा सरकार अब ‘विश्व एड्स दिवससहित कुनै पनि स्मारक दिनहरूमा सन्देश पठाउनबाट टाढा रहने’ नीति अवलम्बन गर्ने उल्लेख छ।

राज्य विभागका प्रवक्ता टमी पिगोटले न्यूयोर्क टाइम्सलाई दिएको प्रतिक्रियामा भने, 'जागरूकता दिवस कुनै रणनीति होइन।' उनका अनुसार राष्ट्रपति डोनाल्ड ट्रम्पको नेतृत्वमा राज्य विभागले जीवन बचाउने तथा बोझ र जिम्मेवारी विदेशी सरकारहरूसँग प्रत्यक्ष साझेदारीमार्फत बाँड्ने काममा केन्द्रित भइरहेको छ।

विश्व एड्स दिवस १९८८ देखि हरेक वर्ष डिसेम्बर १ मा मनाइँदै आएको छ, जसले एचआईभीरएड्सका कारण ज्यान गुमाउने व्यक्तिहरूको सम्झना गर्ने र महामारी नियन्त्रणमा चेतना जगाउने उद्देश्य राख्छ।

ट्रम्प प्रशासनले पछिल्लो समय एचआईभीरएड्सविरुद्धका अन्तर्राष्ट्रिय सहायता कार्यक्रम कटौती गर्ने, अनुसन्धान तथा रोकथामका स्रोत सीमित गर्ने, र पूर्व राष्ट्रपति जर्ज डब्ल्यू। बुशका कार्यकालमा स्थापित विश्वव्यापी एचआईभी कार्यक्रम ‘पेपफर’ मा समेत प्रतिबन्ध र कटौती गर्ने जस्ता कदम चाल्दै आएको छ। एजेन्सी