जुम्लामा रगत अभावको समस्या हुँदैछ समाधान

नेपाल हेल्थ न्युज, काठमाडौं । कर्णाली स्वास्थ्य विज्ञान प्रतिष्ठानको शिक्षण अस्पताल, जुम्लामा बिरामीले रगतको कमीका कारण भोग्दै आएको समस्या चाँडै समाधान हुने भएको छ।

अघिल्ला दिनहरूमा रगत अभावका कारण बिरामीहरू भोग्नुपर्ने कठिनाइ र रगत खोज्न गएका आफन्तहरूको झन्झटको सामना गर्नु परिरहेको थियो। तर केही दिनभित्रै ब्लड बैंक सञ्चालनमा आएपछि बिरामीले आवश्यक रगत सहजै पाउने अपेक्षा गरिएको छ।

स्थानीय बासिन्दा बिर्सबहादुर थापाले अनुभव सुनाउँदै भन्नुभयो, ‘पहिले रगतको समूह थाहा नहुँदा र चिकित्सकको सल्लाह अनुसार मात्र रगत खोज्नुपर्ने हुन्थ्यो। सेना–प्रहरीमा पुगेर मात्र सम्भावना थाहा पाइन्थ्यो। कतिपय अवस्थामा बिरामीलाई समयमै रगत नपाउँदा समस्या उत्पन्न हुन्थ्यो। अब ब्लड बैंक खुलेपछि यो समस्या घट्ने विश्वास छ।’

ब्लड बैंक सञ्चालनका लागि आवश्यक मेसिन अस्पतालमा जडान भइसकेको छ। प्रतिष्ठानले मेसिन चलाउन आवश्यक सबै सामग्री पनि उपलब्ध गराइसकेको छ। उपकुलपति डा. पुजन रोकायाले बताउनुभयो, ‘अब रगत खोज्न बिरामीले कठिनाइ भोग्नु पर्ने छैन, तर रगत दिन इच्छुक व्यक्तिहरू आवश्यक छन्।’

ब्लड बैंक स्थापना गर्न प्रयोग भएको मेसिन अमेरिका–नेपाल मेडिकल फाउण्डेशनले उपलब्ध गराएको हो। डा. रोकायाले थप्नुभयो, ‘भिन्न–भिन्न प्रकारको रगत, जस्तै पातलो, बाक्लो वा सेतो रगत, आवश्यक अनुसार उत्पादन गर्न सकिनेछ। त्यसपछि रगत अस्पतालले आवश्यक ठाउँमा पठाउने व्यवस्था गर्नेछ।’

हाल अधिकांश व्यक्तिहरू रक्तदानमा इच्छुक छैनन्। अहिले रक्तदान गर्नेमा प्रतिष्ठानका विद्यार्थी, स्वास्थ्यकर्मी र नेपाली सेना मात्र सक्रिय छन्। ब्लड बैंकमा रगत एक महिनासम्म सुरक्षित राख्न सकिने भएकोले नियमित रक्तदान आवश्यक हुने डा. रोकायाले बताउनुभयो।

अहिलेसम्म बिरामीलाई ठूलो मात्रामा रगत आवश्यक परेको छैन, तर भविष्यका लागि पर्याप्त रगत उपलब्ध गराउन पहल भइरहेको छ। डा. रोकायाले भन्नुभयो, ‘सभा–समारोह वा विशेष दिनहरूमा बिरामीलाई फलफूल वितरण गर्नुको सट्टा रक्तदानको महत्वमा जनचेतना बढाउनुपर्छ।’

प्रतिष्ठानले रक्तदानमा योगदान पुर्‍याउने नेपाली सेनाका गण–बाहिनीहरूलाई पनि सदैव सम्मान र कृतज्ञता व्यक्त गर्दै आएको छ।