राप्ती स्वास्थ्य विज्ञान प्रतिष्ठानमा उपकुलपति नियुक्ति रोक्न अदालतको अल्पकालीन आदेश

नेपाल हेल्थ न्युज, दाङ । राप्ती स्वास्थ्य विज्ञान प्रतिष्ठानको उपकुलपति नियुक्ति प्रक्रिया हाललाई स्थगित भएको छ । उच्च अदालत तुलसीपुरले यस विषयमा अल्पकालीन आदेश जारी गर्दै नियुक्ति अगाडि नबढाउन निर्देशन दिएको हो ।

उच्च अदालत तुलसीपुरका मुख्य न्यायाधीश राजेश्वर तिवारीको एकल इजलासले यस्तो आदेश दिएको अदालतका सूचना अधिकारी कृष्णप्रसाद शर्माले जानकारी दिनुभयो ।

स्वास्थ्य मन्त्रालयले गत मंसिर २५ गते उपकुलपति नियुक्तिका लागि सूचना प्रकाशित गरेको थियो । तर प्रतिष्ठानका निमित्त निर्देशक जनार्दन पन्थीले उक्त प्रक्रिया विरुद्ध रिट दायर गरेपछि अदालतले हस्तक्षेप गरेको हो ।

शर्माका अनुसार, अदालतले पुस ८ गते दुवै पक्षलाई उपस्थित गराई छलफल गर्ने आदेश दिएको छ । सो मितिसम्म नियुक्ति प्रक्रिया अघि नबढाउन भनिएको छ भने अन्तरिम आदेशलाई निरन्तरता दिने वा नदिने भन्ने विषयमा छलफलपछि निर्णय हुने जनाइएको छ ।