विरोध चर्किएपछि वैदेशिक रोजगारीमा जानेको स्वास्थ्य परीक्षण शुल्क वृद्धि निर्णय खारेज

नेपाल हेल्थ न्युज, काठमाडौं । वैदेशिक रोजगारीमा जाने कामदारको स्वास्थ्य परीक्षणसँग सम्बन्धित हालै लागू गरिएको नयाँ मापदण्ड सरकारले फिर्ता लिएको छ । श्रम, रोजगार तथा सामाजिक सुरक्षामन्त्री राजेन्द्रसिंह भण्डारीले मन्त्रीस्तरीय निर्णय गर्दै पुरानै दरमा स्वास्थ्य परीक्षण गराउने व्यवस्था लागू गर्न निर्देशन दिएका हुन् ।

यस निर्णयसँगै अब वैदेशिक रोजगारीमा जाने श्रमिकले ६ हजार ५ सय रुपैयाँमै मेडिकल परीक्षण गराउन सक्ने भएका छन् । यसअघि श्रम मन्त्रालयले गत ३० कात्तिकमा स्वास्थ्य परीक्षणको दायरा बढाउँदै ३४ प्रकारका जाँच अनिवार्य गरेको थियो, जसका कारण शुल्क बढेर ९ हजार ५ सय रुपैयाँ पुगेको थियो ।

शुल्क वृद्धि श्रमिकमैत्री नभएको भन्दै श्रमिक, व्यवसायी र सरोकारवाला पक्षबाट निरन्तर गुनासो आएपछि सरकार निर्णय पुनरावलोकनमा गएको बताइएको छ ।

प्रधानमन्त्री सुशीला कार्कीको निर्देशनपछि नयाँ मापदण्ड खारेज गरिएको मन्त्री भण्डारीले जानकारी दिनुभयो । सरकारको पछिल्लो निर्णयले वैदेशिक रोजगारीमा जान चाहने श्रमिकलाई आर्थिक भार कम हुने अपेक्षा गरिएको छ ।