नेपाल मेडिकल काउन्सिलको उपाध्यक्ष र सदस्यको निर्वाचन काठमाडौंमा आज र भोलि

नेपाल हेल्थ न्युज, काठमाडौं । नेपाल मेडिकल काउन्सिलको नेतृत्व चयनका लागि आजदेखि दोस्रो चरणको निर्वाचन सुरु भएको छ। यस चरणमा एक जना उपाध्यक्ष र आठ जना सदस्य पदका लागि मतदान भइरहेको हो।

यसअघि उपत्यका बाहिर रहेका १८ वटा मतदान केन्द्रमा ४ देखि ६ पुससम्म मतदान सम्पन्न भइसकेको छ। सोही प्रक्रियालाई निरन्तरता दिँदै आज काठमाडौं, ललितपुर र काभ्रेको धुलिखेल गरी तीन स्थानमा मतदान सञ्चालन गरिएको हो।

निर्वाचन समितिका अनुसार काठमाडौंमा राष्ट्रिय सभा गृह, ललितपुरमा जावलाखेलस्थित नेपाल प्रशासनिक प्रशिक्षण केन्द्र र काभ्रेको धुलिखेलमा काठमाडौं विश्वविद्यालय इन्टरनेशनल सेन्टरलाई मतदान केन्द्र तोकिएको छ।

काठमाडौं र ललितपुरका केन्द्रमा आज र भोलि बिहान ९ बजेदेखि अपराह्न ४ बजेसम्म मतदान हुनेछ भने धुलिखेल केन्द्रमा भने आज मात्र सोही समयावधिमा मतदान हुने तालिका रहेको छ।

काउन्सिलका अनुसार उपत्यका बाहिर सम्पन्न पहिलो चरणको मतदानमा जम्मा ६ हजार ८४६ मत खसेको थियो। सबै २१ वटा मतदान केन्द्रमा मतदान प्रक्रिया पूरा भएपछि मतगणना सुरु गरिने निर्वाचन समितिले जनाएको छ।