नेपाल मेडिकल काउन्सिलको आगामी निर्वाचन अनलाइन भोटिङ हुने

नेपाल हेल्थ न्युज, काठमाडौं । नेपाल मेडिकल काउन्सिलले आगामी निर्वाचन, परीक्षा सञ्चालन र अनुशासन व्यवस्थापनलाई अझ प्रभावकारी बनाउने उद्देश्यले नयाँ निर्णयहरू सार्वजनिक गरेको छ।

काउन्सिलले आगामी निर्वाचनमा चिकित्सकहरूको सहभागीता बढाउन अनलाइन मतदान प्रणाली लागू गर्ने निर्णय गरेको छ। यसले निर्वाचन प्रक्रियालाई पारदर्शी, सहज र प्रविधिमैत्री बनाउने लक्ष्य राखिएको काउन्सिलका रजिष्ट्रार डा. सतिस देव ले जानकारी दिनुभयो।

गत पुसमा सम्पन्न निर्वाचनमा अधिकांश विजयी उम्मेदवारको घोषणापत्रमा मतदान प्रणाली डिजिटलाइज गर्ने र अनलाइन मतदानको व्यवस्था गर्ने योजना रहेको थियो। यसै निर्णयलाई नयाँ कार्यकारिणी बैठकले कार्यान्वयन गर्ने निर्णय गरेको हो। बैठकमा नव निर्वाचित उपाध्यक्ष डा. कुञ्जाङ शेर्पा र अन्य आठ सदस्य उपस्थित थिए।

त्यसैगरी, काउन्सिलले लाइसेन्स तथा स्नातकोत्तर परीक्षालाई निष्पक्ष, एकरूप र समयमै सञ्चालन गर्ने योजना पनि तय गरेको छ। यस अन्तर्गत कम्प्युटर-आधारित परीक्षा प्रणालीमार्फत प्रश्नपत्र सेट तयार गरिने र नेपालका सातै प्रदेशमा एकैसाथ परीक्षा सञ्चालन हुने व्यवस्था मिलाइनेछ। यसअघि परीक्षार्थीहरूलाई काठमाडौं पुग्नुपर्ने बाध्यता थियो।

काउन्सिलका अनुसार यस प्रणालीबाट परीक्षार्थीलाई यात्रा र समयको बचत हुने मात्र नभई परीक्षा प्रक्रियाको पारदर्शिता र गुणस्तर पनि बढ्नेछ।

अनुशासनसम्बन्धी मुद्दाहरूलाई प्रभावकारी रूपमा व्यवस्थापन गर्न काउन्सिलले मेडिको लिगल विभाग गठन गर्ने निर्णय पनि गरेको छ। उक्त विभागमा आवश्यक कानुनी, प्रशासनिक र प्राविधिक जनशक्ति नियुक्त गरिनेछ भने आवश्यक पूर्वाधार र लजिस्टिक सुनिश्चित गरिनेछ।

काउन्सिलको विश्वास छ कि यस निर्णयले अनुशासनसम्बन्धी मुद्दाहरूको अनुसन्धान, निष्पक्ष मूल्यांकन र व्यवस्थापनलाई अझ व्यवस्थित, सुदृढ र विश्वसनीय बनाउनेछ।