मञ्जनको गुणस्तर नियन्त्रण र बजार निगरानीमा ध्यान दिन डेन्टल एसोसिएसनको माग

नेपाल हेल्थ न्युज, काठमाडौं । नेपाल डेन्टल साइन्स हाइजेनिस्ट एसोसिएसनले बजारमा बिक्रीमा रहेका दन्त मञ्जनको गुणस्तर जाँच र निगरानी गरेर आवश्यक कारबाही गर्न सरकारसँग आग्रह गरेको छ।

आज जारी गरिएको विज्ञप्तिमा एसोसिएसनले चार हप्ताभन्दा बढी प्रयोग गर्न नहुने औषधिजन्य मञ्जन समेत खुला बजारमा उपलब्ध हुनु र लामो समय प्रयोग गर्दा स्वास्थ्यमा जोखिम निम्तिन सक्ने बताए।

एसोसिएसनका अध्यक्ष माइकल देवकोटाले २०७९ सालदेखि बजारमा पाइने मञ्जनको गुणस्तर र बनावटको जाँचका लागि मन्त्रालय र औषधि व्यवस्था विभागमा पटक–पटक आग्रह गरे पनि हालसम्म कुनै स्पष्ट मापदण्ड नबनेको बताए।

उनका अनुसार, दैनिक प्रयोग हुने मञ्जनको गुणस्तरबारे राज्य अनभिज्ञ रहेको र औषधिजन्य मञ्जनहरू दर्तावाल दन्त जनशक्तिको सिफारिसबिना समेत सुपरमार्केटमा बिक्री भइरहेकोले जनस्वास्थ्यमा जोखिम सिर्जना भइरहेको छ। देवकोटाले भने, ‘जनताको मुख स्वास्थ्य र समग्र स्वास्थ्यप्रति राज्यको ध्यान पर्याप्त देखिएको छैन।’