विश्व क्यान्सर दिवसमा भक्तपुर क्यान्सर अस्पतालको जनचेतना र क्यान्सर जाँच अभियान

नेपाल हेल्थ न्युज, भक्तपुर । विश्व क्यान्सर दिवसको अवसरमा भक्तपुर क्यान्सर अस्पतालले ललितपुरको मंगलबजार क्षेत्रमा जनचेतना र्याली तथा निःशुल्क क्यान्सर परीक्षण कार्यक्रम आयोजना गरेको छ । पुल्चोकदेखि मंगलबजारसम्म जनचेतना र्याली सञ्चालन गरिएको थियो । सो कार्यक्रममा सर्वसाधारणको उल्लेख्य सहभागिता रहेको थियो ।

हरेक वर्ष फेब्रुअरी ४ मा मनाइने विश्व क्यान्सर दिवस यस वर्ष “युनाइटेड बाइ युनिक” (पृथकतामा एकता) भन्ने नारासहित मनाइँदै छ ।

कार्यक्रम उद्घाटन गर्दै स्वास्थ्य तथा जनसंख्या मन्त्रालयका प्रवक्ता डा. प्रकाश बुढाथोकीले क्यान्सर उपचार क्षेत्रमा हालको लगानी अपर्याप्त रहेको उल्लेख गर्दै क्यान्सर कोषलाई थप सुदृढ बनाउनुपर्ने आवश्यकता औंल्याउनुभयो । 

भक्तपुर क्यान्सर हस्पिटलका कार्यकारी निर्देशक एवं वरिष्ठ क्यान्सर विशेषज्ञ डा. उज्जवल चालिसेले क्यान्सरलाई गम्भीर सार्वजनिक स्वास्थ्य समस्या भएको उल्लेख गर्दै समयमै परीक्षण र उपचारका लागि जनचेतना आवश्यक रहेको उल्लेख गर्नुभयो । 

ललितपुर महानगरपालिका वडा नं. ९ का अध्यक्ष तथा प्रवक्ता राजु महर्जनले महानगरपालिकाले हालसम्म ७ हजार ९१५ जनाको क्यान्सर परीक्षण गर्दा ५८४ जनामा क्यान्सर पोजेटिभ देखिएको जानकारी दिनुभयो । निःशुल्क परीक्षणमा पहिचान भएका बिरामीहरूको उपचार भक्तपुर क्यान्सर अस्पतालमा गरिएको उहाँले बताउनुभयो । साथै, खानपानसँग जोडिएको क्यान्सर जोखिम न्यूनीकरण गर्न भान्सा सुधार कार्यक्रम सञ्चालन गरिएको जानकारीसमेत गराउनुभएको छ ।
कार्यक्रममा सम्बन्धित डाक्टरहरुले क्यान्सरका कारण, उपचार र रोकथामका उपायबारे जानकारी दिनुभएको थियो । सहभागीहरूका लागि निःशुल्क क्यान्सर परीक्षण सेवा  उपलब्ध गराइएको थियो ।