क्लिनिकमा नाम राख्दा सचेत बनौंः चिकित्सकलाई काउन्सिलको आग्रह 

नेपाल हेल्थ न्युज, काठमाडौं । नेपाल मेडिकल काउन्सिलले चिकित्सकहरूले आफ्नो नाम र दर्ता प्रमाणपत्र केवल आफू प्रत्यक्ष रूपमा कार्यरत स्वास्थ्य संस्थामा मात्रै प्रयोग गर्न स्पष्ट निर्देशन दिएको छ ।

दर्तावाल चिकित्सकहरूलाई लक्षित गरी अत्यन्त जरुरी सूचना जारीगर्दै काउन्सिलले चिकित्सकको नाम र दर्ता नम्बर आफू कार्यरत नभएका क्लिनिक वा अस्पतालमा प्रयोग हुँदा सर्वसाधारणमा भ्रम उत्पन्न हुने तथा व्यावसायिक आचारसंहिता उल्लंघन हुने जोखिम देखिएको उल्लेख गरेको छ । 

काउन्सिलले यस्तो अभ्यासले बिरामीहरूलाई गलत सन्देश दिन सक्ने र भविष्यमा कानुनी तथा प्रशासनिक समस्या निम्त्याउन सक्ने चेतावनी दिएको छ।

त्यसैले सबै चिकित्सकलाई आफू कार्यरत नरहेका पुराना स्वास्थ्य संस्थाबाट आफ्नो नाम, प्रमाणपत्र र दर्ता नम्बर तुरुन्त हटाउन निर्देशन दिइएको छ। साथै, साइनबोर्ड, विज्ञापन र दर्ता पुस्तकमा आफ्ना विवरण सही रूपमा प्रयोग भइरहेको छ वा छैन भन्ने विषयमा नियमित निगरानी गर्न पनि आग्रह गरिएको छ।

काउन्सिलका रजिष्ट्रार डा। सतिस कुमार देव ले चिकित्सकहरूलाई व्यावसायिक नैतिकता कायम राख्दै जिम्मेवार ढंगले विवरण प्रयोग गर्न अनुरोध गर्नुभएको छ।