अपेक्षा, जिम्मेवारी र यथार्थः  सांसद डा. कृष्णहरी बुढाथोकीको सन्देश

नेपाल हेल्थ न्युज, काठमाडौं । रामेछापबाट नवनिर्वाचित प्रतिनिधिसभा सदस्य डा. कृष्णहरी बुढाथोकीले जनताको अपेक्षा, संसदीय जिम्मेवारी र संघीय शासन प्रणालीको यथार्थबारे स्पष्ट धारणा सार्वजनिक गर्नुभएको छ।

चुनावपछिको जनविश्वासलाई सम्मान गर्दै उहाँले अबको प्राथमिकता कानून निर्माण, अनुगमन र प्रणाली सुधारमा केन्द्रित हुने बताउनुभएको छ।

 हामी थिति बसाल्न आएका हौँ

सांसद बुढाथोकीले प्रतिनिधिसभाको मूल कार्यहरूलाई पुनः स्मरण गराउँदै भन्नुभयो—सरकार गठन, कानून निर्माण, संसदीय अनुगमन, बजेट पारित तथा सुनुवाइ प्रक्रिया संसदका आधारभूत जिम्मेवारी हुन्।

“हामी केवल विकास बजेट बाँड्ने होइन, देशको दीर्घकालीन प्रणाली बसाल्ने जिम्मेवारी बोकेर आएका हौँ,” उहाँले स्पष्ट पार्नुभयो।

चुनावपछिको विश्वासः जिम्मेवारी अझ बढ्यो

चुनाव सकिएपछि पनि जनताबाट प्राप्त माया, विश्वास र अपनत्वप्रति उहाँले गहिरो कृतज्ञता व्यक्त गर्नुभएको छ। “तपाईंहरूको भरोसाले हामीलाई अझ जिम्मेवार र समर्पित बनाएको छ,” उहाँले भन्नुभयो, “यही ऊर्जा र सहकार्यले सभ्य र समृद्ध समाज निर्माण सम्भव हुन्छ।”

 विकास बजेटः समानता र सन्तुलनको नीति

विकास बजेटका विषयमा जनस्तरमा बढ्दो अपेक्षा रहेको स्वीकार गर्दै उहाँले अब बजेट वितरणमा परिवर्तन आउने संकेत गर्नुभयो।

पार्टी नेतृत्वबाट प्राप्त निर्देशन अनुसार अब कुनै एक क्षेत्र वा जिल्लामा मात्र बजेट केन्द्रित नगरी, देशभर सन्तुलित र न्यायोचित वितरण गरिने उहाँको भनाइ छ।

यद्यपि, “जिल्लाको आवश्यकता अनुसार बजेट ल्याउन हामी समन्वय र पहल जारी राख्नेछौं,” उहाँले थप्नुभयो।

संघीय प्रणालीको यथार्थ: सबै काम सांसदबाट सम्भव छैन

सांसद बुढाथोकीले पछिल्लो समय देखिएको एउटा महत्वपूर्ण प्रवृत्तिमा पनि ध्यानाकर्षण गर्नुभएको छ—सबै काम सांसदले गरिदिनुपर्ने अपेक्षा। उहाँका अनुसार नेपालको संघीय संरचनामा अधिकांश विकास निर्माणका काम स्थानीय तहको जिम्मेवारीमा पर्छन् नीतिगत र धेरै विकास योजनाहरू प्रदेश सरकार अन्तर्गत आउँछन् । संघीय सांसदको मुख्य भूमिका भने कानून निर्माण र कार्यान्वयनको निगरानी हो

“सबै काम एउटै व्यक्तिबाट सम्भव हुँदैन भन्ने यथार्थलाई बुझ्न आवश्यक छ,” उहाँको स्पष्ट आग्रह छ।

भेटघाट र सम्पर्कः समयको सीमितता

जनतासँग प्रत्यक्ष भेटघाट र संवादको चाहना धेरै भए पनि समय व्यवस्थापन चुनौतीपूर्ण बन्दै गएको उहाँले स्वीकार गर्नुभयो।

“चिया र कफी लिऔँ’ भन्ने आत्मीय निम्तोहरू धेरै आइरहेका छन्, तर सबैलाई तुरुन्त समय दिन नसकिरहेकोमा म स्वयं पनि दुःखी छु,” उहाँले भन्नुभयो।

फोन र सन्देशको अत्यधिक चापका कारण तत्काल प्रतिक्रिया दिन नसकिएको स्पष्ट पार्दै उहाँले यसलाई बेवास्ता नभई परिस्थितिको सीमाका रूपमा बुझ्न आग्रह गर्नुभएको छ।

सहकार्यबाट समृद्धि

अन्त्यमा सांसद बुढाथोकीले जनताको विश्वास र सकारात्मक धारणा नै आफ्नो सबैभन्दा ठूलो शक्ति भएको उल्लेख गर्नुभयो। “यही माया, विश्वास र सहकार्यका साथ हामीले सुशासनयुक्त समृद्ध रामेछाप र समग्र देश निर्माणमा महत्वपूर्ण भूमिका खेल्नेछौं,” उहाँको प्रतिबद्धता छ।