इबोला प्रकोप रोक्न रुसले तयार गर्‍यो नयाँ खोप

नेपाल हेल्थ न्युज, रुस । रुसले इबोला भाइरसको नयाँ स्ट्रेनविरुद्ध प्रभावकारी हुन सक्ने खोप विकास गरेको दाबी गरेको छ । अफ्रिकामा इबोला सङ्क्रमणको जोखिम बढिरहेका बेला सार्वजनिक गरिएको यो दाबीले अन्तर्राष्ट्रिय स्वास्थ्य क्षेत्रमा चासो बढाएको छ ।

दक्षिण अफ्रिकास्थित रुसी दूतावासका अनुसार रुसी वैज्ञानिकहरूले विकास गरेको उक्त खोपले हाल प्रकोपसँग जोडिएको दुर्लभ ‘बुन्डिबुग्यो’ स्ट्रेनबाट समेत सुरक्षा दिन सक्ने सम्भावना देखिएको छ । दूतावासले रुसी स्वास्थ्यमन्त्री मिखाइल मुराश्कोलाई उद्धृत गर्दै वैज्ञानिकहरूले इबोला भाइरसको नयाँ स्वरूपविरुद्ध खोप तयार गरेको जनाएको हो ।

हाल मध्य अफ्रिकामा फैलिरहेको इबोला प्रकोपका कारण अन्तर्राष्ट्रिय स्वास्थ्य निकायहरूको चिन्ता बढिरहेको छ । विश्व स्वास्थ्य सङ्गठन (डब्लुएचओ) ले मे १७ मा कङ्गो लोकतान्त्रिक गणतन्त्र (डीआरसी) र युगान्डामा फैलिएको इबोला प्रकोपलाई ‘अन्तर्राष्ट्रिय चासोको सार्वजनिक स्वास्थ्य आपतकाल’ (पीएचइआइसी) का रूपमा वर्गीकृत गरेको थियो ।

स्वास्थ्य तथा परिवार कल्याण मन्त्रालयद्वारा जारी प्रेस विज्ञप्तिअनुसार अफ्रिका रोग नियन्त्रण तथा रोकथाम केन्द्र (अफ्रिका सीडीसी) ले पनि कङ्गो र युगान्डामा फैलिरहेको बुन्डिबुग्यो स्ट्रेनसँग सम्बन्धित इबोला भाइरस रोगको प्रकोपलाई औपचारिक रूपमा पुष्टि गरेको छ ।

यसैबीच, डब्लुएचओको अन्तर्राष्ट्रिय स्वास्थ्य विनियम (आइएचआर) आपतकालीन समितिले मे २२ मा थप सतर्कताका उपाय सुझाउँदै अस्थायी सिफारिसहरू जारी गरेको छ । समितिले बुन्डिबुग्यो भाइरस पुष्टि भएका क्षेत्रबाट आएका अस्पष्ट ज्वरोका बिरामी यात्रुहरूको पहिचान, मूल्याङ्कन, प्रतिवेदन तथा व्यवस्थापनका लागि अन्तर्राष्ट्रिय प्रवेश नाकाहरूमा निगरानी प्रणाली थप सुदृढ बनाउन आग्रह गरेको छ । साथै, सङ्क्रमित क्षेत्रमा अनावश्यक यात्रा नगर्न पनि सिफारिस गरिएको छ ।

प्रेस विज्ञप्तिअनुसार कङ्गो लोकतान्त्रिक गणतन्त्र र युगान्डासँग सीमा जोडिएका देशहरू, विशेषगरी दक्षिण सुडानलगायत क्षेत्रमा रोग फैलिने जोखिम उच्च रहेको आकलन गरिएको छ ।

इबोला अत्यन्त गम्भीर भाइरल रक्तस्रावी ज्वरो हो, जसको मृत्युदर उच्च मानिन्छ । हालसम्म बुन्डिबुग्यो स्ट्रेनबाट हुने इबोला रोगको रोकथाम वा उपचारका लागि कुनै खोप वा विशेष उपचारले औपचारिक स्वीकृति पाइसकेको छैन । यस्तो अवस्थामा रुसले गरेको नयाँ खोप विकासको दाबीलाई अन्तर्राष्ट्रिय स्वास्थ्य समुदायले महत्वका साथ हेरिरहेको छ ।