नेपालमा ३ लाख ८५ हजार ३ सय ७० स्वास्थ्यकर्मी दर्ता

नेपाल हेल्थ न्युज, काठमाडौं । नेपालमा दर्ता भएका स्वास्थ्यकर्मीको संख्या ३ लाख ८५ हजार नाघेको छ। आर्थिक सर्वेक्षण २०८२/८३ अनुसार २०८२ फागुनसम्म विभिन्न नियामक निकायमा दर्ता भएका स्वास्थ्यकर्मीको संख्या ३ लाख ८५ हजार ३ सय ७० पुगेको हो।

गत वर्ष अर्थात् २०८१ फागुनसम्म यस्तो संख्या ३ लाख ६६ हजार ५ सय ५ रहेको थियो। एक वर्षको अवधिमा स्वास्थ्यकर्मी दर्ता संख्या उल्लेख्य रूपमा बढेको देखिएको छ।

तथ्यांकअनुसार २०८२ फागुनसम्म ३५ हजार १ सय ८७ मेडिकल चिकित्सक,  ६ हजार ८३ दन्त चिकित्सक, १२ हजार ९ सय ५३ विशेषज्ञ चिकित्सक, गरी कुल ५४ हजार २ सय २३ चिकित्सक नेपाल मेडिकल काउन्सिलमा दर्ता छन्। २०८१ फागुनसम्म ४९ हजार दुई सय १० चिकित्सक नेपाल काउन्सिलमा दर्ता भएका छन्।

यस्तै, नेपाल नर्सिङ काउन्सिलमा १ लाख २८ हजार ८ सय ३४ नर्स दर्ता भएका छन्। तीमध्ये १ हजार ९ सय ५६ विशेषज्ञ नर्स, ८८ हजार २ सय ३२ नर्स, ३७ हजार ५ सय ९५ अनमी, १ सय ९५ मिडवाइफ तथा ९ सय ५६ विदेशी नर्स रहेका छन्।

नेपाल स्वास्थ्य व्यवसायी परिषद्मा १ लाख ७० हजार २ सय २६ स्वास्थ्यकर्मी दर्ता भएका छन् भने नेपाल आयुर्वेद मेडिकल परिषद्मा २५ हजार ३ सय ३२ स्वास्थ्यकर्मी दर्ता रहेको आर्थिक सर्वेक्षणमा उल्लेख छ।