स्वास्थ्यमन्त्रीको आलोचना गर्ने स्वास्थ्यकर्मी नवेश पक्राउ

नेपाल हेल्थ न्युज, काठमाडौं । स्वास्थ्यमन्त्री निशा मेहताविरुद्ध सामाजिक सञ्जालमा आलोचनात्मक टिप्पणी गरेका स्वास्थ्यकर्मी नवेश अधिकारी पक्राउ परेका छन्। जिल्ला प्रहरी कार्यालय धनुषाबाट खटिएको टोलीले उनलाई सोमबार साँझ करिब ७ः३० बजे जनकपुरबाट नियन्त्रणमा लिएको जनाएको छ।

पक्राउसँगै स्थानीय स्वास्थ्यकर्मीहरूले घटनाको विरोध गर्दै अधिकारीलाई स्पष्ट कानुनी प्रक्रिया पूरा नगरी नियन्त्रणमा लिइएको आरोप लगाएका छन्।

उनीहरूका अनुसार अधिकारी हेल्थ असिस्टेन्ट हुन् र हाल लोकसेवा आयोगको तयारी गरिरहेका थिए। मन्त्रीको कामको आलोचना गर्दै आएका कारण उनलाई पक्राउ गरिएको हुन सक्ने उनीहरूको दाबी छ।

अधिकारीले गत शनिबार फेसबुकमार्फत स्वास्थ्यमन्त्रीको तस्वीरमा रातो क्रस चिन्ह राख्दै ‘माफिया मन्त्री’ भन्ने शब्द प्रयोग गरेका थिए। अर्को पोस्टमा उनले मधेश प्रदेशका अस्पतालहरूमा गरिब नागरिकका लागि १० प्रतिशत शय्या (बेड) व्यवस्था प्रभावकारी रूपमा लागू हुन नसकेको आरोप लगाउँदै मन्त्रीको राजीनामा माग गरेका थिए।

स्वास्थ्यकर्मीहरूको भनाइअनुसार ती फेसबुक पोस्टका आधारमा साइबर ब्युरोमा उजुरी परेको हुन सक्ने र त्यसपछि पक्राउ प्रक्रिया अघि बढाइएको हुन सक्ने आशंका गरिएको छ। यद्यपि, प्रहरी वा सम्बन्धित निकायले पक्राउको आधिकारिक कारण सार्वजनिक गरिसकेका छैनन्।

यस घटनाले सामाजिक सञ्जालमा व्यक्त गरिएका आलोचनात्मक अभिव्यक्तिको सीमाबारे बहस सुरु भएको छ। अभिव्यक्ति स्वतन्त्रताको अधिकार र कानुनी उत्तरदायित्वबीच सन्तुलन कायम गर्नुपर्ने विषयमा विभिन्न क्षेत्रबाट चासो व्यक्त भइरहेको छ।

यस विषयमा प्रहरी, साइबर ब्युरो तथा स्वास्थ्य मन्त्रालयको आधिकारिक धारणा आउन बाँकी छ। घटनाबारे थप विवरण प्राप्त भएपछि समाचार अद्यावधिक गरिनेछ।