नेपालका लागि युएनएफपीएका नवनियुक्त प्रतिनिधि श्रीराम हरिदासद्वारा ओहदाको प्रमाणपत्र पेस

नेपाल हेल्थ न्युज, काठमाडौं। नेपालका लागि संयुक्त राष्ट्रसंघीय जनसङ्ख्या कोष (युएनएफपीए) का नवनियुक्त प्रतिनिधि श्रीराम हरिदास ले परराष्ट्र मन्त्रालयमा आयोजित एक समारोहबीच परराष्ट्र मन्त्री शिशिर खनाल समक्ष आफ्नो ओहदाको प्रमाणपत्र पेस गर्नुभएको छ।

यसअघि करिब एक वर्षसम्म नेपालका लागि युएनएफपीएको अन्तरिम प्रतिनिधिका रूपमा कार्य गरिसक्नुभएका श्रीलङ्काली नागरिक हरिदासले जुलाई २०२६ देखि नेपालका लागि पूर्ण प्रतिनिधिको रूपमा कार्यभार सम्हाल्नुभएको हो। उहाँसँग एसिया र अफ्रिकाका विभिन्न मुलुकमा रणनीतिक नेतृत्व, जनसङ्ख्या कार्यक्रम तथा मानवीय सहायताका क्षेत्रमा २३ वर्षभन्दा बढीको अन्तर्राष्ट्रिय अनुभव रहेको छ।

ओहदाको प्रमाणपत्र बुझाउने क्रममा परराष्ट्र मन्त्री खनाल र प्रतिनिधि हरिदासबीच नेपाल सरकार र युएनएफपीएबीचको दीर्घकालीन साझेदारीलाई अझ सुदृढ बनाउने विषयमा छलफल भएको थियो। छलफलका क्रममा जनसङ्ख्या तथा विकास, यौन तथा प्रजनन स्वास्थ्य तथा अधिकार, लैङ्गिक समानता, तथा तथ्याङ्कमा आधारित नीति निर्माणका क्षेत्रमा रणनीतिक सहकार्यलाई थप प्रभावकारी बनाउने विषयमा सहमति भएको जनाइएको छ।

उक्त अवसरमा नेपालको बदलिँदो जनसाङ्ख्यिक अवस्थालाई सम्बोधन गर्न विश्वसनीय जनसाङ्ख्यिक तथ्याङ्क प्रणाली र विश्लेषणलाई सुदृढ बनाउँदै समावेशी तथा दिगो विकासलाई प्रवर्द्धन गर्ने विषयमा समेत जोड दिइएको थियो।

परराष्ट्र मन्त्री खनालले नेपालले जनसङ्ख्या तथा विकासका प्राथमिकताहरूलाई अघि बढाउन र स्वास्थ्य प्रणालीलाई थप सुदृढ बनाउन युएनएफपीएसँगको लामो सहकार्यलाई उच्च महत्त्व दिएको बताउनुभयो। बदलिँदो जनसाङ्ख्यिक प्रवृत्तिलाई विकास योजनासँग प्रभावकारी रूपमा जोड्न युएनएफपीए लगायत विकास साझेदारहरूसँगको रणनीतिक सहकार्य अपरिहार्य रहेको उहाँको भनाइ थियो।

नवनियुक्त प्रतिनिधि हरिदासले नेपालको विकास प्राथमिकता तथा अन्तर्राष्ट्रिय जनसङ्ख्या तथा विकास सम्मेलनको कार्ययोजनाप्रति युएनएफपीएको प्रतिबद्धता पुनः व्यक्त गर्नुभयो। उहाँले राष्ट्रिय जनसङ्ख्या प्रणालीलाई थप सुदृढ बनाउन सरकार र अन्य सरोकारवालासँग मिलेर काम गर्ने प्रतिबद्धता जनाउँदै नेपाल अहिले महत्त्वपूर्ण जनसाङ्ख्यिक मोडमा रहेको र यसबाट दिगो विकासका लागि नयाँ अवसर सिर्जना गर्न सकिने बताउनुभयो।

हरिदासले जनसाङ्ख्यिक सूचना तथा ज्ञान प्रणालीलाई सुदृढ बनाउने, महिला, किशोरी र युवाहरूको अधिकार तथा छनोटको संरक्षण गर्ने तथा जनसङ्ख्याको गतिशीलतालाई समावेशी र दिगो विकाससँग जोड्न नेपाल सरकारसँगको सहकार्यलाई अझ विस्तार गर्न आफू उत्साहित रहेको उल्लेख गर्नुभयो।

युएनएफपीएले सन् १९७१ देखि नेपाल सरकारसँग साझेदारी गर्दै आएको छ। संस्थाले यौन तथा प्रजनन स्वास्थ्य तथा अधिकार, लैङ्गिक समानता, युवा सशक्तीकरण, जनसङ्ख्या तथ्याङ्क प्रणालीको सुदृढीकरण तथा विकासको मूल प्रवाहमा कोही पनि पछि नपर्ने लक्ष्य हासिल गर्न नेपाललाई निरन्तर सहयोग गर्दै आएको छ।