निजामती कर्मचारी अस्पतालको कार्यकारी निर्देशकमा डा जितेन्द्र परियार नियुक्त

नेपाल हेल्थ न्युज, काठमाडौं । सरकारले निजामती कर्मचारी अस्पतालको कार्यकारी निर्देशक पदमा प्राडा जितेन्द्र परियारलाई नियुक्त गरेको छ।

भूमि व्यवस्था, सहकारी, संघीय मामिला तथा सामान्य प्रशासन मन्त्रालयले सोमबार सूचना प्रकाशित गर्दै सिफारिस समितिले योग्यताक्रमको पहिलो नम्बरमा सिफारिस गरेका परियारलाई कार्यकारी निर्देशक नियुक्त गर्ने निर्णय भएको जनाएको हो।

मन्त्रालयका अनुसार अस्पतालको रिक्त कार्यकारी निर्देशक पदका लागि गत असार ५ गते आवेदन आह्वान गरिएको थियो। आवेदन दिएका उम्मेदवारहरूको मूल्याङ्कनपछि सिफारिस समितिले साउन ३ गते परियारलाई योग्यताक्रमको पहिलो नम्बरमा सिफारिस गरेको थियो।

उक्त सिफारिसका आधारमा अस्पताल विकास समितिको साउन ४ गते बसेको बैठकले परियारलाई कार्यकारी निर्देशक नियुक्त गर्ने निर्णय गरेको मन्त्रालयले जनाएको छ।

मन्त्रालयद्वारा जारी सूचनामा सिफारिस समितिको मूल्याङ्कन तथा अस्पताल विकास समितिको निर्णयका आधारमा योग्यताक्रमको पहिलो नम्बरमा रहेका प्राडा जितेन्द्र परियारलाई कार्यकारी निर्देशक पदमा नियुक्त गरिएको उल्लेख गरिएको छ।

यससँगै लामो समयदेखि रिक्त रहेको निजामती कर्मचारी अस्पतालको कार्यकारी निर्देशक पदमा नयाँ नेतृत्व नियुक्त भएको छ।