६३ जनामा जापानिज इन्सेफलाइटिस संक्रमण हुँदा १६ को मृत्यु

नेपाल हेल्थ न्युज, काठमाडौं । नेपालमा जापानिज इन्सेफलाइटिस (जेइ) संक्रमणबाट मृत्यु हुनेको संख्या १६ पुगेको छ । पछिल्लो तथ्यांकअनुसार जेइ संक्रमितको संख्या ६३ पुगेको हो ।

परिवार कल्याण महाशाखाका अनुसार हालसम्म देशका २२ जिल्लाका ५० स्थानीय तहमा जेइ संक्रमित भेटिएका छन् । देशभर ८७८ जनामा एक्युट इन्सेफलाइटिस सिन्ड्रोम (एईएस) का केस देखिएकोमा ६३ जनामा जेइ संक्रमण पुष्टि भएको हो ।

पछिल्लो पाँच दिनमा मात्रै थप नौ जनामा जेइ संक्रमण पुष्टि भएको महाशाखाले जनाएको छ । संक्रमितमध्ये ३४ पुरुष र २९ महिला छन् । हाल ३१ जना संक्रमित उपचाररत छन् ।

जेइ संक्रमणबाट मृत्यु भएका सबै १६ जनाले खोप नलगाएको पाइएको छ । मृतकमध्ये नौ महिला र सात पुरुष छन् । मृत्यु भएकामध्ये ८८ प्रतिशत ५० वर्षभन्दा माथिका रहेको महाशाखाको तथ्यांकले देखाएको छ । उमेर समूहअनुसार ६० वर्षभन्दा माथिका व्यक्तिमा जेइ संक्रमणको जोखिम बढी देखिएको छ ।

जेइ संक्रमणबाट झापामा पाँच जनाको मृत्यु भएको छ । सुनसरी र सप्तरीमा दुई–दुई तथा मोरङ, इलाम, रौतहट, धनुषा, पर्सा, काभ्रे र दाङमा एक–एक जनाको मृत्यु भएको महाशाखाले जनाएको छ ।

यसअघि मुख्यतः नेपालको पूर्वी क्षेत्रमा देखिँदै आएको जेइ संक्रमण पछिल्लो समय पश्चिमतर्फसमेत फैलिँदै गएको छ । महाशाखाको जापानिज इन्सेफलाइटिससम्बन्धी स्थिति प्रतिवेदनअनुसार अधिकांश संक्रमित धानबारी तथा सुँगुर फार्म आसपास बसोबास गर्नेहरू छन् । संक्रमितमध्ये ६२ प्रतिशतको मुख्य पेसा कृषि रहेको पाइएको छ ।

जापानिज इन्सेफलाइटिस लामखुट्टेको टोकाइबाट सर्ने मस्तिष्कसम्बन्धी गम्भीर संक्रामक रोग हो । जेइ भाइरसबाट संक्रमित हाँस, कुखुरालगायतका चराचुरुङ्गी तथा सुँगुरलाई टोकेको लामखुट्टेले मानिसलाई टोक्दा संक्रमण सर्न सक्छ ।

नेपालमा जेइ संक्रमण विशेषगरी साउनदेखि कात्तिकसम्म बढी देखिने गरेको छ । विज्ञहरूले जोखिम क्षेत्रका नागरिकलाई लामखुट्टेको टोकाइबाट बच्न सावधानी अपनाउन तथा उपलब्ध जेइ खोप लगाउन आग्रह गर्दै आएका छन् ।