शिक्षण अस्पतालले सार्वजनिक गर्‍यो बाढीपहिरोमा घाइते ३१ जनाको नामावली, एक जनाको मृत्यु

नेपाल हेल्थ न्युज, काठमाडौं । रसुवा, नुवाकोट, गोरखा तथा धादिङ जिल्लामा आएको भीषण बाढीपहिरोमा परी घाइते भएकामध्ये त्रिभुवन विश्वविद्यालय शिक्षण अस्पताल, महाराजगञ्जमा ३१ जना उपचाररत रहेको अस्पताल प्रशासनले जनाएको छ।

अस्पतालले बिहीबार (भदौ ११) बिहान ११ः३० बजेसम्म सार्वजनिक गरेको विवरणअनुसार उपचाररत बिरामीमध्ये एक जनाको मृत्यु भएको छ भने पाँच जना सघन उपचार कक्ष (आईसीयू) मा भेन्टिलेटरको सहायतामा उपचाररत छन्।

अस्पतालका अनुसार २५ वर्षीय कुसल मगरको उपचारका क्रममा मृत्यु भएको हो। यस्तै, पेमा तामाङ, पवित्रा कार्की, राजेन्द्र भट्टा, मिनबहादुर श्रेष्ठ गरी चार जना आईसीयू–एमा भेन्टिलेटरमा छन्। आईसीयू–बीमा उपचाररत बालबहादुर घर्ती र अशोक श्रेष्ठसहित अन्य घाइतेको पनि उपचार भइरहेको छ।

अस्पतालको विवरणअनुसार केही घाइते उपचारपछि डिस्चार्जसमेत भएका छन्। डिस्चार्ज हुनेमा गिरीलाल भुडाथोकी, सुजन बस्नेत, रुपक रोका, सुशान्त श्रेष्ठ र कर्मा योन्जन नागरकोटी रहेका छन्।

बाँकी घाइतेहरू अर्थोपेडिक वार्ड, इमर्जेन्सी तथा अन्य उपचार कक्षमा उपचाररत रहेको अस्पतालले जनाएको छ। भारतका ४३ वर्षीय नवलेश शर्मासमेत इमर्जेन्सीको रेड एरियामा उपचाररत छन्।

अस्पताल प्रशासनले बाढीपहिरोमा घाइते भई उपचारका लागि ल्याइएका बिरामीको अवस्था र उपचारसम्बन्धी विवरण सार्वजनिक गर्दै आएको छ।

नोटः यो समाचार अस्पताल प्रशासनले भदौ ११ गते बिहान ११ः३० बजेसम्म सार्वजनिक गरेको विवरणमा आधारित छ। बिरामीको स्वास्थ्य अवस्था परिवर्तन हुन सक्ने भएकाले पछिल्लो अद्यावधिक विवरण अस्पतालबाट लिनुपर्ने हुन्छ।