रसुवा बाढी : ट्रमा सेन्टरमा उपचाररत ९ जना, २२ जना डिस्चार्ज

नेपाल हेल्थ न्युज, काठमाडौं । रसुवामा आएको विनाशकारी बाढीमा परी घाइते भएका ३५ जनामध्ये २२ जना उपचारपछि राष्ट्रिय ट्रमा सेन्टरबाट डिस्चार्ज भएका छन् ।

राष्ट्रिय ट्रमा सेन्टरका सूचना अधिकारी शिवकुमार निरौलाका अनुसार शुक्रबार बिहानसम्म ९ जना घाइते अस्पतालमा उपचाररत छन् । उपचाररतमध्ये एक जना सघन उपचार कक्ष (आईसीयू) र दुई जना हाइ डिपेन्डेन्सी युनिट (एचडीयू) मा उपचार भइरहेको छ ।

एक जना बिरामीलाई थप उपचारका लागि अन्य अस्पतालमा रिफर गरिएको निरौलाले जानकारी दिनुभयो । बाढीमा परी घाइते भएकाहरूलाई रसुवा, नुवाकोटलगायत विभिन्न जिल्लाबाट उपचारका लागि ट्रमा सेन्टर ल्याइएको थियो । उपचाररत घाइतेहरूको उमेर ६ वर्षदेखि ६० वर्षसम्म रहेको अस्पतालले जनाएको छ ।

निरौलाका अनुसार उपचाररत बिरामीहरूमा टाउको, हातखुट्टा, छाती तथा शरीरका विभिन्न भागमा चोट लागेको छ । उनीहरूमध्ये केहीको अवस्था सामान्य रहेको छ भने केहीको अवस्था स्थिर रहेको छ ।

बाढीपछि अस्पतालमा ल्याइएका घाइतेहरूको उपचारसँगै आवश्यक व्यवस्थापन भइरहेको अस्पतालले जनाएको छ । घाइते तथा बिरामीको स्वास्थ्य संवेदनशीलतालाई ध्यानमा राख्दै अस्पतालले अस्पताल परिसरमा अनावश्यक भीड नगर्न आग्रह गरेको छ । साथै, घाइते तथा बिरामीको अनुमति र अस्पतालसँगको समन्वयबिना अन्तर्वार्ता तथा भिडियो फुटेज नलिन पनि ट्रमा सेन्टरले आग्रह गरेको छ ।