राप्ती स्वास्थ्य विज्ञान प्रतिष्ठानका कर्मचारीले दुई दिनको तलब प्रधानमन्त्री दैवी प्रकोप उद्धार कोषमा सहयोग गर्ने

नेपाल हेल्थ न्युज, दाङ । रसुवाको भोटेकोशी नदीमा आएको विनाशकारी बाढीबाट प्रभावित नागरिकको उद्धार तथा सहयोगका लागि राप्ती स्वास्थ्य विज्ञान प्रतिष्ठानले प्रतिबद्धता जनाएको छ ।

प्रतिष्ठानका उपकुलपति अजयकुमार मिश्रद्वारा जारी सार्वजनिक प्रतिबद्धतामा बाढीमा परी ज्यान गुमाएका नागरिकप्रति श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरिएको छ । साथै, बाढीबाट घाइते भएकाहरूको शीघ्र स्वास्थ्य लाभको कामना गरिएको छ ।

विपद्को दुःखद् घडीमा बाढीपीडितको सहयोग र उद्धारका लागि प्रतिष्ठानका शिक्षक तथा कर्मचारीहरूले स्वेच्छिक रूपमा दुई दिनको तलब बराबरको रकम प्रधानमन्त्री दैवी प्रकोप उद्धार कोषमा जम्मा गर्ने निर्णय गरेका छन् ।

त्यसैगरी प्रतिष्ठानमा कार्यरत शिक्षक तथा कर्मचारीहरूले व्यक्तिगत तहबाट समेत आर्थिक तथा भौतिक सहयोग गरिरहेको जनाइएको छ । आवश्यकता र परिस्थितिका आधारमा आगामी दिनमा पनि सहयोगलाई निरन्तरता दिइने प्रतिष्ठानले जनाएको छ ।

प्रतिष्ठानले नेपाल सरकारका विभिन्न निकायसँग समन्वय गरी विपद् प्रभावित क्षेत्रका नागरिकलाई आवश्यक स्वास्थ्य सेवासहित अन्य सहयोग उपलब्ध गराउन सधैँ तत्पर रहने प्रतिबद्धता व्यक्त गरेको छ ।

प्राकृतिक विपद् तथा सम्भावित प्राकृतिक र मानव सिर्जित आपत्कालीन अवस्थाबाट प्रभावित नागरिकको जीवनरक्षा र स्वास्थ्य सेवा प्रवाहका लागि प्रतिष्ठान सदैव तयार र प्रतिबद्ध रहेको सार्वजनिक प्रतिबद्धतामा उल्लेख छ ।