सुरुङबाट उद्धार गरिएका सञ्जय साहको स्वास्थ्य अवस्था सामान्य

नेपाल हेल्थ न्युज, काठमाडौं । त्रिशूली थ्री ‘ए’ जलविद्युत् आयोजनाको सुरुङबाट जीवितै उद्धार गरिएका सञ्जय साहको स्वास्थ्य अवस्था सामान्य रहेको पाइएको छ ।

उद्धारपछि नेपाली सेनाले गरेको स्वास्थ्य परीक्षणका क्रममा साहको अवस्था सामान्य रहेको पुष्टि भएको हो । नेपाली सेनाले पनि उनको स्वास्थ्य अवस्था सामान्य रहेको जानकारी दिएको छ ।

साहसँगै उद्धार गरिएका अर्का व्यक्ति कविर महर्जनलाई भने थप उपचारका लागि काठमाडौंस्थित छाउनी अस्पताल ल्याइँदै छ । महर्जनलाई हेलिकप्टरमार्फत छाउनी अस्पताल ल्याउने तयारी गरिएको हो ।

रसुवामा आएको बाढीपछि करिब १० दिनदेखि सुरुङभित्र फसेका उनीहरूलाई नेपाली सेना, सशस्त्र प्रहरी बललगायत सुरक्षा निकायको संयुक्त टोलीले जीवितै उद्धार गरेको हो ।