नेपाल चिकित्सक संघ सुर्खेत शाखाको अध्यक्षमा डा. केएन पौडेल

नेपाल हेल्थ न्युज, सुर्खेत । नेपाल चिकित्सक संघ सुर्खेत शाखाको अध्यक्ष पदको जिम्मेवारी डा. केएन पौडेलले सम्हालनुभएको छ। नयाँ जिम्मेवारी पाएसँगै डा. पौडेलले चिकित्सकहरूको पेसागत हकहित संरक्षणसँगै कर्णाली प्रदेशको स्वास्थ्य सेवा प्रणालीलाई थप सुदृढ र प्रभावकारी बनाउने बताउनुभएको छ।

अध्यक्ष डा. पौडेलले चिकित्सकहरूबीच आपसी एकता, सहकार्य र विश्वासको वातावरणलाई थप मजबुत बनाउँदै चिकित्सकीय पेसाको गरिमा र साख उच्च राख्न आफ्नो कार्यकाल केन्द्रित गर्ने प्रतिबद्धता व्यक्त गर्नुभयो।

कर्णाली प्रदेशका दूरदराजका क्षेत्रमा समेत स्वास्थ्य सेवाको पहुँच विस्तार गर्दै सेवामुखी, प्रभावकारी र सर्वसुलभ स्वास्थ्य सेवा सुनिश्चित गर्न आफूले अभिभावकीय तथा समन्वयकारी भूमिका निर्वाह गर्ने उहाँको भनाइ छ।

पदभार ग्रहण गरेपछि अध्यक्ष डा. पौडेलको अध्यक्षतामा बसेको शाखाको पहिलो बैठकले संस्थागत कार्य सञ्चालनलाई व्यवस्थित र प्रभावकारी बनाउने उद्देश्यले विभिन्न निर्णय गरेको छ।

बैठकले प्रदेश अस्पताल परिसरमै नेपाल चिकित्सक संघ सुर्खेत शाखाको कार्यालय स्थापना गरी सञ्चालनमा ल्याउने निर्णय गरेको छ। त्यस्तै, संघका गतिविधिलाई थप व्यवस्थित र प्रभावकारी बनाउन विभिन्न विषयगत उपसमिति गठन गर्ने निर्णयसमेत गरिएको छ।

बैठकले प्रत्येक महिनाको अन्तिम साता शाखाको नियमित बैठक बस्ने तथा संस्थागत गतिविधि सञ्चालनका लागि पदाधिकारी र सदस्यहरूबाट मासिक रूपमा आर्थिक योगदान संकलन गर्ने निर्णय पनि गरेको छ।

अध्यक्ष डा. पौडेलले शाखालाई चिकित्सकहरूको पेसागत हकहितका लागि सक्रिय बनाउँदै कर्णालीको स्वास्थ्य क्षेत्र सुधारमा रचनात्मक भूमिका खेल्ने बताउनुभएको छ।