अमेरिका १ अर्ब डलरमा कोरोनाको खोप किन्दै

  जनस्वास्थ्य सरोकार, काठमाडौँ । कोरोना भाइरससँग लडिरहेको अमेरिकाले जोनसन एन्ड जोनसन कम्पनीबाट १ अर्ब डलरमा कोभिड १९ को सम्भावित खोपको १० करोड डोज खरिद गर्ने भएको छ । डेढ लाख अमेरिकीको ज्यान लिइसकेको कोरोना भाइरससँग लड्नका लागि ट्रम्प प्रशासनले खोप र औषधी जम्मा पार्ने दिशामा अर्को ठुलो कदम उठाएको हो । यो खोपको एक डोजको मुल्य करिब १० डलर पर्न गएको छ । यसअघि मार्च महिनामा अमेरिकाले जोनसन एन्ड जोनसनलाई ४५ करोड ६० लाख डलर दिएको थियो । यो बाहेक अमेरिकाले फाइजर र जर्मनी बायोटेक कम्पनीसँग पनि १९ दशमलव ५० प्रति डोज दरले खोप खरिद गर्ने सम्झौता गरेको थियो । यसबीच अक्सफोर्ड युनिभर्सिटीले विकास गरेको खोप ३ देखि ४ डलर प्रति डोज पर्ने सम्भावना ब्यक्त गरिएको छ । अमेरिकाको स्वास्थ्य विभागका अनुसार यदि जोनसन एन्ड जोनसनको खोपलाई खोप लगाउने अभियानमा समावेश गरियो भने यो निशुल्क पनि हुन सक्छ । अमेरिकी सरकारले थप २० करोड खोपको अर्डर पनि दिन सकिने बताइएको छ ,। जोनसन एन्ड जोनसनले यदी उसको परीक्षण सफल भएमा सन् २०२१ मा कोरोना भाइरस खोपको एक अर्ब डोज बनाउने आशा ब्यक्त गरेको छ । अमेरिका र विश्वभरी आफनो खोप निर्माण क्षमता अझ बढाइरहेको कम्पनीले जनाएको छ । विश्व भरी करिब १ सय ५० कोरोना भाइरस खोपमा काम गरिरहेका छन् । यसमा २३ खोपको मानव परीक्षण शुरु भइसकेको छ । यसमा पनि ३ खोप आफनो अन्तिम चरण अर्थात तेस्रो चरणमा छ । यसमा दुई कम्पनी चीनका छन् भने तस्रो अक्सफोर्ड युनिभर्सिटीको हो । युरोपेली युनियनको जोनसन एन्ड जोनसन र सानोफी कम्पनीसँगको कुराकानीमा उनीहरुको खोप पनि अन्तिम चरणमा पुगेको छ । एजेन्सी