देशभर थपिए ३७९० जना कोरोना संक्रमित, सक्रिय संक्रमितको संख्या ४० हजार नाघ्यो

जनस्वास्थ्य सरोकार, काठमाडौँ । नेपालमा पछिल्लो २४ घण्टामा थप ३ हजार ७९० जनामा कोरोना भाइरस (कोभिड–१९) संक्रमण पुष्टि भएको छ । योसंगै नेपालमा कोरोना संक्रमितको संख्या १ लाख ३६ हजार ३६ पुगेको स्वास्थ्य तथा जनसंख्या मन्त्रालयले नियमित प्रेस ब्रिफ्रिङमा जानकारी दिएको छ । वितेको २४ घण्टामा देशभरका विभिन्न ल्यावबाट १५ हजार ७१४ जनाको पीसीआर जाँच गरिएको छ । हालसम्म १३ लाख ९१८ जनाको पीसीआर परीक्षण भएको छ । आज थप २३३५ जना कोरोना संक्रमित निको भएर घर फर्किएका छन् ।

यो सहित देशभर कोरोनामुक्त हुनेको संख्या ९४ हजार ५०१ पुगेको मन्त्रालयको प्रवक्ता प्रा.डा. जागेश्वर गौतमले जानकारी दिनुभयो । कोरोनासक्रमण मुक्त हुने दर ६९.५ प्रतिशत रहेको स्वास्थ्य मन्त्रालयले जनाएको छ ।

प्रा. डा. गौतमका अनुसार वितेको २४ घण्टामा थप १८ जनाको कोरोना संक्रमणबाट मृत्यु भएको छ । यो संगै कोरोना संक्रमणबाट ज्यान गुमाउनेको संख्या ७५६ पुगेको छ । देशभर सक्रिय संक्रमितको संख्या ४० हजार ७८८ रहेको छ । ति मध्ये १३ हजार ८५१ जना संस्थागत आइसोलेसनमा रहेका छन् भने २६ हजार ९२७ जना होम आइसोलेसनमा रहेका छन । हाल देशभर ४ हजार ४७० जना क्वारेन्टीनमा रहेका छन ।