सप्तरी र हेटौंडाका थप दुई जनाको कोरोना संक्रमणबाट मृत्यु

जनस्वास्थ्य सरोकार, काठमाडौँ । सप्तरी र हेटौंडाका थप दुई जनाको कोरोना भाइरस संक्रमणबाट मृत्यु भएको छ । सप्तरीको विष्णपुर गाउँपालिकाको सिम्राहा गाउँकी २३ वर्षीया महिला र चितवनको भरतपुर अस्पतालमा हेटौंडा उपमहानगरपालिका ६ का एक ८२ वर्षीय वृद्धको मृत्यु भएको हो । सप्तरीकी महिलालाई बिरामी भएपछि शनिबार धरानस्थित बीपी कोइराला स्वास्थ्य विज्ञान प्रतिष्ठानमा भर्ना गरिएको थियो । उनको पीसीआर रिपोर्ट बुधबार पोजिटिभ आएको थियो । पिसाबमा समस्या भएपछि विराटनगरमा उपचार पश्चात निको भएर मृतक महिला राजविराज ९ मलेठस्थित माइत फर्किएकी थिइन् । शनिबार लगातार बान्ता भएपछि बिपी प्रतिष्ठान लगिएकी महिलाको बिहीबार बिहान मृत्यु भएको प्रतिष्ठानले जनाएको छ । हेटौंडाका ८२ वर्षीय वृद्धमा कात्तिक १५ गते कोरोना संक्रमण पुष्टि भएको थियो । ज्वरो, खोकी र श्वासप्रश्वासमा समस्या भएपछि बुधबार अस्पताल भर्ना भएका थिए।