खोप खरीदमा निजी क्षेत्रलाई सरकारले तेर्स्यायो तीन शर्त

जनस्वास्थ्य सरोकार, काठमाडौं । कोरोना विरुद्धको खोप खरिदमा ईच्छुक देखिएको निजी क्षेत्रलाई सरकारले तीन शर्त राखेको छ ।

औषधि व्यवस्था विभागमा खरिद गरिने खोपको परिमाण, मूल्य र खरिद गरेर ल्याउने समयसीमा सहितको विवरण पेश गर्नुपर्ने प्रावधान राखिएको छ । त्यस्तै स्वास्थ्य तथा जनसंख्या मन्त्रालयले तय गरेका तीन शर्त पुरा गरेर मात्र खोप खरिद गर्न सकिने भएको छ ।

आइतबार काठमाडौंमा प्रधान सम्पादकहरुसँग गरिएको अन्तरक्रिया कार्यक्रममा बोल्दै स्वास्थ्य मन्त्रालयका सचिव लक्ष्मण अर्यालले तीन शर्त पुरा गरेपछि मात्र निजी क्षेत्रलाई खोप आयात गर्न दिइने बताउनुभयो । उहाँले भन्नुभयो—सरकारले तोकेको मुल्यमा खोप बेच्नुपर्छ । मन्त्रालयले तोकेको स्वास्थ्य संस्थाले मात्र खोप वितरण गर्नुपर्छ । मन्त्रालयले तोकेको प्राथमिकताको आधारमा मात्र खोप लगाउनुपर्ने हुन्छ ।’