जीतपुरमा ४० जनाको निशुःल्क मोतियाविन्दुको शल्यक्रिया

जनस्वास्थ्य सरोकार, धनकुटा । धनकुटा जिल्लाको महालक्ष्मी नगरपालिका जीतपुरमा ४० जनाको मोतियाविन्दुको स्थानीय तहमै निशुःल्क शल्यक्रिया गरिएको छ । रामप्रसाद पोख्रेल आँखा अस्पताल धनकुटासँग सहकार्य गरी महालक्ष्मी नगरपालिकाले नगरका सबै वडामा आँखा जाँच शिविर सञ्चालन गरेर मोतियाविन्दु भएकाहरुको निःशुल्क शल्यक्रिया गरेको हो ।

फागुन १४ गते देखि २२ गतेसम्म वडाहरुमा आँखा जाँच शिविर सञ्चालन गरिएको थियो । उक्त शिविरमा ६ सय ६० जनाको आँखा जाँच गर्दा ८१ जनामा मोतियाविन्दुको स्मस्या देखिएकाले ४० जनाको शल्यक्रिया गरिएको हो ।

जसमध्ये अप्रेशन गर्न चाहने ४० जनालाई जितपुर स्थित महालक्ष्मी आधारभुत अस्पतालमा ल्याएर मोतियाविन्दुको निःशुल्क शल्यक्रिया गरिएको महालक्ष्मी नगरपालिकाले जनाएको छ । रामप्रसाद पोख्रेल आँखा अस्पतालका चिकित्सकले मोतियाविन्दुको शल्यक्रिया गर्नु भएको हो ।

शल्यक्रिया गर्न विरामीहरुलाई अस्पतालसम्म ल्याउँने, पुर्याउँने व्यवस्था समेत नगरपालिकाले नै मिलाएको थियो । निःश’ल्क शल्यक्रिया गरी औषधि समेत निःशुल्क उपलब्ध गराएर बिरामीहरुलाई गाउँ–गाउँमै पुर्याइएको महालक्ष्मी नगरपालिकाका जनस्वास्थ्य अधिकृत डिल्लीराम श्रेष्ठले जानकारी दिनुभयो ।रासस