काठमाडौं प्रवेश गर्ने प्रत्येक नाकामा एन्टीजेन परीक्षण

जनस्वास्थ्य सरोकार, काठमाडौँ । काठमाडौं प्रवेश गर्ने प्रत्येक नाकामा अब कोभिड-१९ को एन्टीजेन परीक्षण हुने भएको छ। काठमाडौँ जिल्ला कोभिड-१९ नियन्त्रण तथा रोकथाम समिति  (डीसीएमसी) को सोमबार बसेको बैठकले सो निर्णय गरेको हो ।

डीसीसीएमसीले काठमाडौँ प्रवेश गर्ने नाकाहरुमा स्वास्थ्य जाँच र एन्टीजेन परीक्षण गर्न आवश्यक हेल्थ डेस्कको व्यवस्था गर्न मातहतका नगरपालिकालाई निर्देशन दिएको छ । परीक्षणक लागि आवश्यक पर्ने सामाग्री भने जिल्ला स्वास्थ्य कार्यालयले उपलब्ध गराउने जनाएको छ ।

त्यस्तै एन्टीजेन परीक्षणमा नेगेटिभ देखिएपनि लक्षण देखिएमा भने पीसीआर परीक्षणको लागि स्वाब संकलन गरिने बैठकले निर्णय गरेको छ।

प्रत्येक नगरपालिका र महानगरपालिकाले एक एक वटा आइसोलेसन र क्वारेन्टाइन सञ्चालन गर्न र पहिले संचालनमा आएकालाई पुनःसंचालनमा ल्याउने समेत निर्णय भएको छ।

स्वास्थ्य कार्यालय, नगरपालिका, सुरक्षा निकाय लगायतलाई कोभिड सम्बन्धी जनचेतना प्रचार प्रसार र सरकारको स्वास्थ्य मापदण्ड पालना नगरे कारबाही गर्ने समेत निर्णय गरिएको छ।

त्यस्तै सार्वजनिक स्थानमा गरिने कार्यक्रम स्थगित गर्ने र गर्नैपर्ने कार्यक्रमहरुलाई सरकारको मापदण्ड पालना गरेर गर्नुपर्ने निर्णय गरेको छ।