नेपालमा पहिलो पटक देखियो ‘डबल म्युटेन्ट भेरिएन्ट’

जनस्वास्थ्य सरोकार, काठमाडौँ । नेपालमा पनि कोभिड-१९ को ‘डबल म्युटेन्ट भेरिएन्ट’ फेला परेको छ । ललितपुरमा संकलन गरिएको नमुनामा ‘डबल म्युटेन्ट भेरिएन्ट’ फेला परेको हो ।

इपिडिमियोलोजी तथा रोग नियन्त्रण महाशाखाका निर्देशक डा. कृष्ण पौडेलका अनुसार मुलुकमै पहिलो पटक यस्तो भेरिएन्ट भेटिएको हो । यो संक्रमणको विकास नेपालबाटै भएको हो वा भारतसँग सम्बन्धित छ भनेर अनुसन्धान सुरु गरिएको छ ।

निर्देशक डा. पौडेलका अनुसार १५ वटा नमुनामध्ये एस-जीन नेगेटिभ भएका १० र पोजेटिभ भएका ५ नमुना हङ्कङस्थित विश्व स्वास्थ्य सङ्गठनबाट मान्यताप्राप्त प्रयोगशालामा पठाइएको थियो । त्यसमा १० वटा एस-जीन नेगेटिभमध्ये २१ देखि ५९ उमेर समूहका ९ जनामा यूके भेरिअन्ट भएको प्रमाणित भएको हो ।

त्यस्तै ५ जनामध्ये एक जनामा डबल म्युटेन्ट भाइरस फेला परेको निर्देशक डा. पौडेलले बताउनुभयो । डबल म्युटेन्ट भेरिएन्ट भनेको एकै भाइरस परिवर्तन भई दुई प्रकारको स्वरूप देखिनु हो । भाइरसले आफूलाई लामो समयसम्म प्रभावकारी बनाउन आफ्नो जेनेटिक संरचनामा परिवर्तन गरिरहन्छ ।

नेपालमा हालसम्म १५८ जनामा यूके भेरिअन्ट पुष्टि भएको स्वास्थ्य तथा जनसंख्या मन्त्रालयले जनाएको छ । तीमध्ये सबैभन्दा धेरै ३८ जना २१ देखि ३० वर्षका र ३६ जना ३१ देखि ४० वर्षका छन् । १ देखि २० वर्षका मानिसहरूमा पनि यो भेरिअन्ट फैलिरहेको पाइएको छ ।