मनाङपछि मुस्ताङ बन्यो कोरोनाको पूर्ण खोप लगाउने जिल्ला

जनस्वास्थ्य सरोकार, मुस्ताङ । मुस्ताङमा पनि १८ वर्ष माथिका सबै नागरिकहरुलाई कोरोना विरुद्धको खोप लगाइएको छ ।

योसँगै मुस्ताङ १८ वर्ष भन्दा माथिका सबै नागरिकले खोप लगाउने दोस्रो जिल्ला बनेको छ । यसअघि मनाङले १८ वर्ष माथिका सबैलाई कोरोना खोप लगाइसकेको छ ।

स्वास्थ्य कार्यालय मुस्ताङका प्रमुख टीकाराम भण्डारीका अनुसार १८ वर्षभन्दा माथिका ९ हजार ३०० नागरिकलाई खोप लगाइएको छ ।

मुस्ताङमा विभिन्न क्षेत्रमा काम गर्न बाहिरी जिल्लाबाट पुगेका २ सय १३ नागरिकलाई पनि खोप लगाइएको स्वास्थ्य कार्यालयले जनाएको छ । योसँगै मुस्ताङमा पूर्ण खोप पाउनेको सङ्ख्या ९ हजार ५१३ रहेको छ ।

मुस्ताङमा ६ हजार ७ सय २१ जनाले जोनसन एण्ड जोनसनको खोप लगाएका हुन् भने, ३२० जनाले भेरोसेल खोपको पूर्ण डोज लगाएका हुन् । त्यसैगरी २ हजार ४ सय ७२ जनाले कोभिशिल्ड खोपको पूर्ण डोज लगाएका हुन् ।