काठमाडौँ उपत्यकामा आजदेखि तीन दिनसम्म भेरोसेलको दोस्रो मात्रा लगाईंदै

जनस्वास्थ्य सरोकार, काठमाडौं । काठमाडौँ उपत्यकामा आजदेखि भेरोसेल खोपको दोस्रो मात्रा लगाईंदैछ ।

भेरोसेलको पहिलो मात्रा लगाएकालाई आजदेखि तीन दिनसम्म दोस्रो मात्राको खोप लगाइने जिल्ला स्वास्थ्य कार्यालयका प्रमुख बद्रीबहादुर खड्काले जानकारी दिनुभयो ।

भेरोसेल खोपको पहिलो मात्रा लगएका ५० वर्ष वा सोभन्दामाथि उमेरका समूहका सबैलाई दोस्रो मात्रा दिइने छ । यस्तै विश्वविद्यालय र विद्यालयका प्राध्यापक, शिक्षक र कर्मचारी सार्वजनिक यातायातका चालक र सहचालकले पनि खोप पाउने छन् ।

सरकारले तोकेको अत्यावश्यक सेवामा कार्यरत व्यक्ति तथा खोप अनिवार्य गरिएका विदेशमा जाने नेपालीलाई पनि भेरोसेलको दोस्रो मात्रामा खोप दिइनेछ । भेरोसेलको पहिलो मात्रा लगाएका र यसअघिका छुटेका अन्यलाई पनि खोप दिइनेछ ।