कपिलवस्तुको ६ स्थानीय तहमा फैलियो हैजा, ६ जनाको मृत्यु

जनस्वास्थ्य सरोकार, कपिलवस्तु । कपिलवस्तुको ६ स्थानीय तहमा हैजा फैलिएको छ । जसले गर्दा ६ जनाको मृत्यु भएको जिल्ला जनस्वास्थ्य कार्यालयले जनाएको छ ।

जिल्लाको कृष्णनगर नगरपालिका,शिवराज नगरपालिका,महाराजगन्ज नगरपालिका, बुद्धभुमी नगरपालिका,विजयनगर गाउँपालिका र यशोधरा गाउँपालिकामा हैजा फैलिएको पुष्टि गरिएको जिल्ला जनस्वास्थ्य कार्यालय कपिलवस्तुले जनाएको छ ।

जिल्ला खुल्ला दिशामुक्त भए पनि जनचेतनाको कमीले यो महामारी फैलिएको कृष्णनगर नगरपालिका प्रमुख रजत प्रताप शाहले जनाएका छन् । हैजा बाट बच्न सरसफाइ,खुल्ला चौरमा दिशा पिसाब,केही खानु भन्दा अगाडी साबुन पानीले राम्रो सँग हात धोएर मात्र खान र पानी तताएर पिउन नगरप्रमुख शाहले मिडिया मार्फत अनुरोध गरेका छन् ।

हैजा फैलिएको १ महिना ५ दिन भई सक्दा पनि शिवराज अस्पतालमा दैनिक ५ देखि १० बिरामी पुगी रहेको तथ्याङ्क छ । अस्पतालमा बिरामी आउनेको सङ्ख्या घटे पनि समुदायमा हैजाको बिरामी रहेको स्थानीयको दाबी छ । यसलाई पूर्ण नियन्त्रण गर्न गाउँ गाउँमा सचेतना कार्यक्रम,र्‍याली,सडक नाटक तथा स्वास्थ्य शिविर सञ्चालन गर्नु पर्ने स्थानीयको बुझाई छ ।

हैजा नियन्त्रण नभएपछि सरकारले खोपको तयारी गरेको छ । विश्व स्वास्थ्य सङ्गठन मार्फत ढाई लाख खोप ल्याउने तयारी गरिएको जनाइएको छ ।