नेपालमा पनि भेटियो ओमिक्रोन भेरियन्ट

जनस्वास्थ्य सरोकार, काठमाडौँ । नेपालमा पनि कोरोना भाइरसको नयाँ भेरियन्ट ओमिक्रोन पुष्टि भएको छ । 

स्वास्थ्य तथा जनसङ्ख्या मन्त्रालयले आज प्रेस विज्ञप्ति जारी गर्दै नेपालमा दुई जनामा ओमिक्रोन संक्रमण पुष्टि भएको जनाएको हो । 

ओमिक्रोन पुष्टि भएको देशबाट नेपाल आएका एक जना ६६ वर्षीय विदेशी नागरिक र उनको सम्पर्कमा रहेका अर्का ७१ वर्षीय व्यक्ति गरी दुई जनामा ओमिक्रोन भेरियन्ट पुष्टि भएको मन्त्रालयद्वारा जारी विज्ञप्तिमा उल्लेख छ । 

राष्ट्रिय जनस्वास्थ्य प्रयोगशाला टेकुमा परीक्षण गर्दा उनीहरूमा आइतबार राती ओमिक्रोन भेरियन्ट पुष्टि भएको हो । 

संक्रमित दुवैको अवस्था सामान्य रहेको र उनीहरू सरकारले तोकेको मापदण्ड अनुसार आइसोलेसनमा रहेका छन् । 

यस्तै सङ्क्रमितको सम्पर्कमा रहेका अन्य ६६ जनाको कनट्र्याक्ट ट्रेसिङ गर्दा सबैमा नेगेटिभ रिपोर्ट आएको पनि विज्ञप्तिमा उल्लेख छ । 

ओमिक्रोन भेरियन्ट पुष्टि भएसँगै नेपालमा यसको निगरानीका लागि सर्भिलेन्स तथा कनट्र्याक्ट ट्रेसिङको कार्यालयलाई थप प्रभावकारी बनाएको मन्त्रालयले जनाएको छ । 

कोरोनाको नयाँ भेरियन्ट ओमिक्रोन हालसम्म ३५ देशमा फैलिएको छ भने ५ सय ७४ जना संक्रमित बनेका छन् ।