नेपालमा सक्रिय संक्रमितको संख्या २५ हजार नाघ्यो

जनस्वास्थ्य सरोकार, काठमाडौं । पछिल्लो २४ घण्टामा ४ हजार ९६१ जनामा कोरोना भाइरस संक्रमण पुष्टि भएको छ । जम्मा १५ हजार १३१ नमुना परीक्षण गर्दा उक्त संख्यामा संक्रमण पुष्टि भएको हो ।

स्वास्थ्य तथा जनसंख्या मन्त्रालयकाअनुसार १२ हजार ५६२ पिसिआर परीक्षण गर्दा ४ हजार ५३४ जनामा र २५ सय ६९ एन्टीजेन परीक्षण गर्दा ४२७ जनामा भाइरस संक्रमण पुष्टि भएको हो । यस अवधिमा जना ४३५ कोभिड–१९ संक्रमणमुक्त भएका छन् भने संक्रमणको कारणले ३ जनाको निधन भएको छ ।

हाल देशभर सक्रिय संक्रमितको संख्या २५ हजार ६८० जना रहेको छ । सक्रिय संक्रमितमध्ये २४ हजार ५८४ र संस्थागत आइसोलेसनमा १ हजार ९६ गरि जम्मा २५ हजार ६८० जना आइसोलेसनमा रहेका छन् । संस्थागत आइसोलेसनमा रहेकामध्ये १२२ जना आइसियूमा र १२ जना भेन्टिलेटरमा उपचारत छन् ।