डा. गोविन्द केसी त्रिवि शिक्षण अस्पतालमा भर्ना

नेपाल हेल्थ न्युज, काठमाडौं । इलाममा अनसनरत डा. गोविन्द केसीको स्वास्थ्य अवस्था बिग्रिएपछि थप उपचारका लागि काठमाडौं ल्याइएको छ। उनलाई नेपाली सेनाको हेलिकप्टरमार्फत काठमाडौं ल्याएर त्रिवि शिक्षण अस्पतालमा भर्ना गरिएको छ।

डा. केसीले गत १२ गतेदेखि इलाममा अनसन सुरु गरेका थिए। अनसनका क्रममा स्वास्थ्यमा समस्या देखिएपछि गत शनिबार उनलाई इलाम जिल्ला अस्पतालमा भर्ना गरिएको थियो।

त्यहाँ उपचार भइरहे पनि स्वास्थ्य अवस्था थप जटिल बन्दै गएपछि उपचारमा संलग्न चिकित्सकहरूले थप उपचारका लागि सुविधासम्पन्न अस्पतालमा स्थानान्तरण गर्न सिफारिस गरेका थिए।

चिकित्सकको सिफारिसअनुसार सरकारले नेपाली सेनाको हेलिकप्टर पठाएर उनलाई काठमाडौं ल्याएको हो। हाल उनको उपचार त्रिवि शिक्षण अस्पतालमा भइरहेको छ।