अब नेपाल प्रवेश गर्दा पूर्ण मात्रा खोप नलगाएका र लक्षण देखिएकाले मात्रै कोरोना परीक्षण गर्नुपर्ने

जनस्वास्थ्य सरोकार, काठमाडौं । अबदेखि नेपालका सिमा नाका तथा त्रिभुवन अन्तर्राष्ट्रिय विमानस्थलमा प्रवेश गर्दा पूर्ण मात्रा खोप नलगाएका र लक्षण देखिएकाले मात्रै कोरोना परीक्षण गर्नुपर्ने भएको छ ।

त्रिभुवन अन्तर्राष्ट्रिय विमानस्थलसहित नेपाल प्रवेश गर्ने सीमा नाकामा कोरोना भाइरसको पूर्ण मात्रा खोप नलगाएका र लक्षण देखिएकाले मात्रै स्वास्थ्य परीक्षण गर्नुपर्ने स्वास्थ्य तथा जनसंख्या मन्त्रालयले जनाएको छ ।

मन्त्रालयले आइतबार सूचना जारी गर्दै पूर्ण खोप नलगाएका ५ वर्ष माथिका बालबालिकामा पनि लक्षण देखिएमा नाकामा परीक्षण हुने बताएको छ । सरकारले पूर्ण खोप लगाएका तथा कोरोना संक्रमणसँग मिल्दोजुल्दो लक्षण नदेखिएकाहरुको भने स्वास्थ्य परीक्षण नगर्ने जारी सूचनामा उल्लेख गरीएको छ ।