रामेछापका ४४ हजार बालबालिकालाई टाइफाइडविरुद्धको खोप लगाइँदै

जनस्वास्थ्य सरोकार, रामेछाप । रामेछापमा १५ महिनादेखि १५ वर्षमुनिका बालबालिकालाई टाइफाइड विरुद्धको खोप अभियानको आज शुभारम्भ भएको छ ।

स्वास्थ्य कार्यालय रामेछापमा रामेछापका प्रमुख जिल्ला अधिकारी दिपक कुमार पहाडीले खोप अभियानको शुभारम्भ गर्नुभएको हो ।

उहाँले आजदेखि देशभर खोप लगाउन सुरु भएको बताउनुहुँदै नजिकैको खोप केन्द्रमा गएर खोप लगाउन सबैमा अनुरोध गर्नुभयो ।

खोप अभियानको पहिलो दिन आज गंगालाल एकेडेमीका १४ जना विद्यार्थीलाई खोप लगाइएको छ ।

जिल्लाभरका ४४ हजार ४ सय १० जना बालबालिकालाई खोप लगाइने जिल्ला स्वास्थ्य कार्यालय रामेछापले जनाएको छ । ३६ हजार ३ सय ३० जना विद्यालयका र ८ हजार ८७ जना विद्यालय बाहिरका बालबालिकालाई टाइफाइड विरुद्धको खोप लगाउने लक्ष्य राखिएको छ । खोप लगाउनका लागि जिल्लामा २९० वटा खोप केन्द्र तोकिएको छ ।