लोसपाको घोषणापत्र : हरेक पालिकामा २५ शैय्याको अस्पताल निर्माणदेखि जेष्ठ नागरिकको नियमित स्वास्थ्य परीक्षणसम्म

जनस्वास्थ्य सरोकार, काठमाडौँ । आगामी बैशाख ३० गते हुने स्थानीय निर्वाचनको लागि लोकतान्त्रिक समाजवादी पार्टीले आज घोषणापत्र सार्वजनिक गरेको छ ।

शुक्रबार बबरमहलस्थित पार्टी कार्यालयमा आयोजित कार्यक्रममा अध्यक्ष महन्थ ठाकुर, वरिष्ठ नेता राजेन्द्र महतोलगायतले घोषणापत्र सार्वजनिक गर्नुभयो ।

लोसपाको घोषणा पत्रमा सर्वसुलभ गुणस्तरीय स्वास्थ्य सेवालाई प्राथमिकता दिइएको छ । स्वास्थ्य सेवालाई सर्वसुलभ, विश्वासनीय, गुणस्तरीय र आमजनता लगायत गरिब एवं असहाय सबैले धान्न सक्ने बनाउन विशेष व्यवस्था गरिएको छ ।

हरेक वडामा सामान्य उपचारका साथसाथै प्रसुति, सर्प दंश र हृदयघातबाट बचाउन सकिने सुविधासहितका वडा स्वास्थ्य उपचार केन्द्र स्थापना गरिने घोषणपत्रमा प्रतिवद्धता जनाएको छ ।

हरेक पालिकामा प्याथोलोजी, प्रसूति गृह, आपतकालिन सेवा सहितको कम्तिमा २५ शैयाको उच्च प्रविधियुक्त गुणस्तरीय अस्पताल स्थापना गर्ने उल्लेख गरिएको छ । र भएका अस्पताललाई आधुनिक बनाउने पनि स्पष्ट पारेको छ ।

बालबालिकालाई घरमै गएर नियमित खोपको व्यवस्था गरिने, ज्येष्ठ नागरिकका लागि घरमै गएर कम्तिमा महिनाको एक पटक स्वास्थ्य परीक्षण गरिने र हरेक वडामा कम्तिमा दुईवटा एम्बुलेन्ससहित ग्रामीण एम्बुलेन्स सेवाको विस्तार गरिने पनि घोषणापत्रमा उल्लेख छ।  

सहज र तनावरहित स्वास्थ्य उपचारको उद्देश्यले हरेक नागरिकका लागि अनिवार्य स्वास्थ्य बिमाको व्यवस्था गरिने साथै आयुर्वेदिक चिकित्सा पद्धतिलाई थप विस्तार र प्रभावकारी बनाइने घोषणापत्रमा उल्लेख छ।