घरेलु काममा एम्बुलेन्सको प्रयोग गर्दा दुर्घटना

जनस्वास्थ्य सरोकार, डोटी । बिरामी बोक्न प्रयोग हुँदै आएको एम्बुलेन्स घरेलु काममा प्रयोगका क्रममा डोटीमा दुर्घटनामा परेको छ ।

डोटीको बडीकेदार गाउँपालिका वडा नम्बर १ बर्छैन स्वास्थ्य चौकीको एम्बुलेन्स गत बिहीबार राती १० बजे दुर्घटनामा परेको हो । एम्बुलेन्स चालक तेज बोहराले आफ्नै काका पुष्कर बोहरालाई घर पुर्याउ जाँदा वीपीनगरको सोखानमा दुर्घटना भएको हो।

स्थानीयले भने गैरचालकले मदिरा सेवन गरेर एम्बुलेन्स चलाउँदा दुर्घटना भएको दाबी गरेका छन् । एम्बुलेन्सको बीमा नवीकरण समेत नभएको अवस्थामा काकालाई बोकेर रातीको समयमा घरायसी प्रयोजनमा सो एम्बुलेन्स प्रयोग भएको हो । वडा नम्वर १ का वडा अध्यक्ष डम्बरबहादुर बोहराले पनि दुर्घटना हुनै नसक्ने स्थानमा दुर्घटना भएको बताएका छन् ।