अनशनरत डा गोविन्द केसीको स्वास्थ्य अवस्था जटिल

जनस्वास्थ्य सरोकार, धनगढी । चिकित्सा शिक्षामा सुधार गर्नुपर्ने माग राख्दै अनशन बस्नुभएका अभियन्ता डा गोविन्द केसीको स्वास्थ्य अवस्था जटिल बन्दै गएको छ ।

धनगढीस्थित श्रीकृष्ण मन्दिरको धर्मशालामा २०औँ सत्याग्रह सुरु गरेका केसीलाई स्वास्थ्य अवस्था जटिल बन्दै गएपछि सेती प्रादेशिक अस्पतालमा भर्ना गरिएको छ ।

अस्पतालमा उहाँले औषधि लिन नमानेको बताइएको छ । अस्पतालले पनि उहाँसँग कसैलाई भेट गर्न दिएको छैन । उहाँको रक्तचाप निकै घटेको बताइएको छ । रक्तचाप अहिले ९०/६० पुगेको र मुटुको चाल पनि घट्दो क्रममा रहेको छ । उहाँलाई सामान्य स्लाइन पानी चढाइएको छ ।

तीन करोड नेपाली जनताका लागि अनशन बसेको भन्दै स्वास्थ्य अवस्था तलमाथि हुँदैमा फरक नपर्ने उहाँले बताउनुभएको बताइएको छ । उहाँले धनगढीमा अनशन बसेको आज पाँचौँ दिन हो ।