ललितपुर महानगरद्धारा पाटन अस्पतालमा झुल वितरण

जनस्वास्थ्य सरोकार, ललितपुर । ललितपुर महानगरले पाटन अस्पतालमा भर्ना भएर डेंगीको उपचार गराइरहेका बिरामीका लागि झुल वितरण गरेको छ ।

महानगरका सामाजिक विकास समितिका संयोजक राजु महर्जनले आइतबार अस्पतालमा आयोजित एक कार्यक्रममा अस्पतालका निर्देशक प्राध्यापक डाक्टर रवि शाक्यलाई १५० थान झुल हस्तान्तरण गर्नुभएको हो ।

समितिका संयोजक राजु महर्जनले अन्य बिरामीलाई जोगाउन महानगरले डेंगी संक्रमितलाई झुल दिएको जानकारी दिनुभयो । अस्पतालका निर्देशक रवि शाक्यले कोभिडलाई नै ओझेलमा पर्ने गरी डेंगीको प्रकोप फैलिएको बताउँदै महानगरले दिएको झुलको सन्देश सकारात्मक भएको उल्लेख गर्नुभयो ।

केही दिनयता अस्पतालमा उपचार गर्न आउनेमध्ये डेंगुका १५० जना नयाँ संक्रमित थपिने गरेको अस्पतालले जनाएको छ ।