आज अन्तर्राष्ट्रिय मर्यादित महिनावारी दिवस, विभिन्न चेतनामूलक कार्यक्रम गरी मनाइँदै

जनस्वास्थ्य सरोकार, काठमाडौं । आज विश्वभर अन्तर्राष्ट्रिय मर्यादित महिनावारी दिवस मनाइँदैछ । ‘बालविवाह अन्त्यको लागि मर्यादित महिनावारी’ भन्ने नारासहित नेपालमा पनि आज विभिन्न जनचेतनामूलक कार्यक्रम गरी यो दिवस मनाइँदैछ ।

नेपालमा अझै पनि महिनावारीका समयमा प्रभावकारी र सुरक्षित ढंगले प्याड प्रयोग नगर्दा धेरै महिलामा स्वास्थ्य समस्या हुँदै आएको छ । तथ्यांकअनुसार नेपालमा प्रजनन उमेरका २० प्रतिशत महिलाले मात्रै सुरक्षित तवरले महिनावारी प्याड प्रयोग गर्ने गरेको पाइएको छ ।

कम गुणस्तरको प्याडको प्रयोग, लामोसमय एउटै प्याडको प्रयोग वा पुराना घरायसी कपडाको निरन्तर प्रयोग असुक्षित हुने स्वास्थ्यकर्मीहरूले बताउँदै आएका छन् ।

नेपालमा प्याड निःशुल्क गर्नुपर्ने माग बेलाबेलामा उठ्ने गरेको भए पनि सरकारले बेवास्ता गर्दै आएको छ ।