यी हुन् एसिड पीडितको थप उपचार गर्ने चार अस्पताल

जनस्वास्थ्य सरोकार, काठमाडौँ । सरकारले एसिड आक्रमणमा परेकालाई आकस्मिक उपचारपश्चात् थप उपचार गर्नु परेमा उपत्यकाका चार अस्पतालमा निःशुल्क उपचार गर्ने व्यवस्था गरेको छ ।

स्वास्थ्य तथा जनसङ्ख्या मन्त्रालयको राष्ट्रिय स्वास्थ्य शिक्षा, सूचना तथा सञ्चार केन्द्रले सूचना निकाल्दै आकस्मिक उपचारपश्चात् थप उपचार गर्नु परेमा महाराजगञ्जस्थित त्रिभुवन विश्वविद्यालय शिक्षण अस्पताल, वीर अस्पताल, पाटन अस्पताल र कीर्तिपुर अस्पतालमा गरी चारवटा अस्पतालमा निः शुल्क उपचार गरिने व्यवस्था गरेको जनाएको छ ।

मन्त्रिपरिषद्को निर्णय भए बमोजिम एसिड आक्रमणमा परेका पीडितहरूको उपचारसम्बन्धि कार्यविधि २०७८ अनुसार पीडितहरूले आकस्मिक उपचारका लागि देशका कुनै पनि स्वास्थ्य संस्थाबाट निःशुल्क सेवा लिन सक्नेछन् ।