‘जीवन रक्षाः तपाईंको हातमा’ : आज अन्तर्राष्ट्रिय बाल्यकाल क्यान्सर दिवस मनाइँदै

जनस्वास्थ्य सरोकार, काठमाडौँ । आज विश्वभर अन्तर्राष्ट्रिय बाल्यकाल क्यान्सर दिवस मनाइँदैछ ।

बाल्यकालमा हुने क्यान्सरका विरुद्ध जनचेतना बढाउन हरेक वर्ष फेब्रुअरी १५ तारिखका दिन यस दिवस मनाउन सुरु गरिएको हो ।

यस वर्षको अन्तर्राष्ट्रिय बाल्यकाल क्यान्सरबिरुद्धको दिवसको नारा ‘जीवन रक्षाः तपाईंको हातमा’ तय गरिएको छ ।

हरेक वर्ष विश्वभर झन्डै दुई लाख ८० हजार बालबालिका र १९ वर्षमुनिका जनसंख्याहरूमा क्यान्सर हुने गरेको पाइन्छ । हरेक तीन मिनेटमा विश्वभरका बालबालिकाको क्यान्सरले मृत्यु हुने गरेको विश्व स्वास्थ्य संगठन (डब्लुएचओ) को तथ्याङ्क छ ।

उच्च आय भएका देशहरूमा ८० प्रतिशत क्यान्सरबाट बाँच्ने धेरै सम्भावना रहेको छ भने कम र मध्यम आय भएका देशहरूमा २० प्रतिशत मात्र बाँच्ने सम्भावना रहेको डब्लुएचओले जनाएको छ ।

समयमै पत्ता लगाएर उपचार गरे बालबालिकामा हुने क्यान्सर ९० प्रतिशतभन्दा बढी निको हुने कान्ति बाल अस्पतालको भनाइ छ।

यसका अलावा बाल्यकालमा क्यान्सर भएका बालबालिकाहरूका लागि सहयोग र साथ दिने हिसाबले पनि यस दिवसको रूपरेखा तयार गरिएको छ ।