सांसद चन्द्र भण्डारीकी आमा हरिकलाको उपचारको क्रममा निधन

जनस्वास्थ्य सरोकार, काठमाडौं । ग्यास सिलिन्डर विस्फोटबाट घाइते हुनुभएकी नेपाली कांग्रेसका नेता डा. चन्द्र भण्डारीकी आमा हरिकला भण्डारीको निधन भएको छ ।

कीर्तिपुर अस्पतालमा उपचारको क्रममा आमा हरिकलाको बिहान १० बजेर ५७ मिनेट जाँदा निधन भएको पारिवारिक स्रोतले जनाएको छ । उहाँ ८९ वर्षकी हुनुहुन्थ्यो ।

आमासँगै घाइते हुनुभएका नेता डा. भण्डारीको कीर्तिपुर क्लिफ्ड एण्ड बर्न सेन्टरमा उपचार भइरहेको छ । भण्डारीको अवस्था जटिल बन्दै गएपछि थप उपचारका लागि भारतको मुम्बईस्थित नेसनल बर्न सेन्टरमा लैजाने तयारी गरिएको छ ।

गएराति बुद्धनगरस्थित घरमा ग्यास लिक भएर आगलागी हुँदा आमा घाइते भएको र बचाउन जाँदा सांसद भण्डारी पनि घाइते हुनुभएको बताइएको छ ।

भण्डारीको अनुहार, दुवै हात र दुवै खुट्टा गरी करिब ३० प्रतिशत भाग जलेको अस्पतालले जनाएको छ ।