मुम्बईमा उपचाररत सांसद भण्डारीको अवस्था सामान्य, कृतिम अक्सिजनको मात्रा कम गरिँदै

जनस्वास्थ्य सरोकार, काठमाडौं । भारतको मुम्बईस्थित नेशनल बर्न सेन्टरमा उपचाररत नेपाली कांग्रेसका नेता एवं सांसद डा. चन्द्र भण्डारीको स्वास्थ्य अवस्था सामान्य बन्दै गएको छ ।

आज बिहान १०ः३० बजे चिकित्सकबाट काउन्सिलिङ सम्पन्न भएको भन्दै अस्पतालबाट उहाँका सहयोगी माधव न्यौपानले स्वास्थ्य अवस्था सामान्य बन्दै गएको जानकारी दिनुभएको छ ।

उपचारमा संलग्न चिकित्सकको भनाईलाई उद्धृत गर्दै न्यौपानले भन्नुभयो–‘डाक्टरबाट काउन्सिलिङ सम्पन्न भएको छ । अहिले कृत्तिम अक्सिजनको मात्रा कम गर्दै लगिएको छ भने भोलिदेखि ट्रायलमा भेन्टिलेटर हटाएर हेरिने भएको छ ।’

उहाँका अनुसार हातको जलेको भागले पनि काम गर्न थालेको छ । अहिले दुवै खुट्टाको शल्यक्रियापछिको पहिलो ड्रेसिङ भइरहेको छ । सुन्निएको भाग पनि घट्दै गएको छ ।

गत बुधबार राति काठमाडौंको घरमा ग्यास लिक भएर आगलागीमा परी भण्डारी घाइते हुनुभएको थियो । उहाँको आमाको भने बिहीबार बिहान निधन भएको छ ।

डा. भण्डारीलाई बिहीबार दिउँसो श्रीएयरलाइन्सको विमान मार्फत मुम्बई लगिएको थियो ।