मौसम परिवर्तनसँगै रुघाखोकी र ज्वरोका बिरामी बढे

जनस्वास्थ्य सरोकार, काठमाडौँ । देशभरका अस्पतालहरुमा मौसमी रुघाखोकी र ज्वरोका बिरामी बढ्न थालेका छन् । मौसम परिवर्तनसँगै वातावरण प्रदुषण लगायतका कारण बिरामी पर्नेको संख्या बढिरहेको टेकु अस्पतालका सरुवा रोग विशेषज्ञ डा. शेरबहादुर पुन बताउनुहुन्छ ।

‘अहिले धेरैजसो रुघाखोकी र ज्वरोका बिरामी बढेका छन् । मौसम परिवर्तनको समयमा शरीरको रोगसँग लड्ने प्रतिरक्षात्मक क्षमता कम हुने भएकाले बिरामी पर्ने सम्भावना धेरै हुने गर्दछ '-डा. पुन भन्नुहुन्छ ।

मौसम परिवर्तन हुँदै गर्दा शरीर कमजोर हुने, खाना खान मन नलाग्ने, वाकवाक लाग्ने, टाउको दुख्ने, ज्वरो आउने जस्ता लक्षण देखिने डा. पुनको भनाई छ ।

सामान्य मानिने रुघाखोकीको समयमै उपचार नगरे यसले जटिल रुप लिने विज्ञहरु बताउँछन् । सामान्य खालको रुघाखोकीलाई घरमै आराम गरेर र तातो झोलिलो खानेकुरा खाएर निको पार्न सकिन्छ ।

तर, एक हप्तासम्म पनि रुघाखोकी निको नभए परीक्षणका लागि अस्पताल जान डा. पुनले सुझाउनुभयो । प्रशस्त मात्रामा शुद्ध पानी पिउने, हरियो सागसब्जी, फलफूल र घरकै ताजा स्वस्थकर खाना खाने गरे रोग लाग्नबाट बच्न सकिने उहाँको भनाई छ ।

डा. पुन भन्नुहुन्छ–‘घरबाट बाहिर निस्कँदा मास्क लगाउने, सकेसम्म भिडभाडमा नजाने, जानै परे भौतिक दूरी कायम गर्ने गरे प्रदुषणका कारण पर्ने असरसँगै संक्रामक रोग लाग्नबाट बच्न सकिन्छ ।’