मिर्गौला उपचारमा सक्रिय मार्क इन्टरनेशनल किड्नी सेन्टर चौथो वर्षमा प्रवेश

जनस्वास्थ्य सरोकार, काठमाडौं । मिर्गौला उपचारमा सक्रिय मार्क इन्टरनेशनल किड्नी सेन्टर चौथो वर्षमा प्रवेश गरेको छ । सेन्टरद्धारा सञ्चालित ‘स्वस्थ्य मिर्गौला, स्वस्थ्य जीवन अभियान’ स्वास्थ्य क्षेत्रमा सुधार ल्याउन चालिएको महत्वपूर्ण कदम मानिएको छ ।

नेपाली समाजमा मिर्गौला रोगको जनचेतना फैलाउने कार्यमा अग्रसर रहेको सेन्टरले मिर्गौला रोगसँगै अन्य रोगहरुकोसमेत सहज तरिकाले पहिचान एवं रोकथाम गराउन आवश्यक कदम चाल्दै आएको छ ।

राजधानीमा आयोजित पत्रकार सम्मेलनमा बोल्दै सेन्टरका अध्यक्ष एवं मिर्गौला रोग विशेषज्ञ डा. अर्चन शमसेर राणाले बेलाबेलामा मिर्गौला परीक्षण गरेर सजग रहन सकेमा ९० प्रतिशत मिर्गौला बचाउन सकिने उल्लेख गर्नुभयो । मिर्गौला ९० प्रतिशत ड्यामेज भइसकेपछि मात्र लक्षण देखिने गरेको पाइन्छ ।

१० जनामध्ये १ जनामा मिर्गौलामा समस्या हुनसक्ने उल्लेख गर्दै डा. राणाले दैनिक ४—५ लिटर पानी पिउनेलगायत स्वस्थ्य जीवनशैली अपनाउन आग्रह गर्नुभयो ।

आफ्नो चौथो बार्षिकोत्सव एवं विश्व मिर्गौला दिवसका अवसरमा २५ गते दरबारमार्गमा बिहान ७ बजे वाकाथोन, लाजिम्पाटस्थित सरकारी धारा चोकमा रहेको सेन्टरको नवनिर्मित नयाँ भवनमा २५ र २६ गते १० बजेदेखि ५ बजेसम्म निःशुल्क मिर्गौला परीक्षण र २७ गते नारायण चौर नक्सालमा निःशुल्क वृहत स्वास्थ्य शिविर एवं रक्तदान कार्यक्रमको आयोजना गरेको छ ।