वरिष्ठ मुटुरोग विशेषज्ञ डा. अवनिभूषण उपाध्यायको ‘मुुटुसँग सहयात्रा’ पुस्तक सार्वजनिक

जनस्वास्थ्य सरोकार, काठमाडौं । विगत ४ दशकदेखि मुटुरोग उपचारमा समर्पित वरिष्ठ मुटुरोग विशेषज्ञ डा. अवनिभूषण उपाध्यायको ‘मुटुसँग सहयात्रा’ पुस्तक सार्वजनिक भएको छ ।

राजधानीमा आयोजित कार्यक्रममा वरिष्ठ मुटुरोग विशेषज्ञ डा. मृगेन्द्रराज पाण्डे र काठमाडौँ विश्वविद्यालयका पूर्व उपकुलपति प्रा.डा. सुरेशराज शर्माले सो कृतिको लोकार्पण गर्नुभएको हो ।

आत्मवृत्तान्तमा आधारित सो पुस्तकको प्रकाशक इदा उपाध्याय हुनुहुन्छ ।

पुस्तकभित्र एक नेपाली डाक्टरको जीवन कथा, भोगाइ, अवसर र चुनौतीका अतिरिक्त नेपाली समाजको चित्रण, मुलुकको स्वास्थ्य प्रशासन, राजनीतिक र भूगोललगायका विषयको रोचक चित्र समेटिएको छ ।

पुस्तकमा रोचक सन्दर्भ, व्यावसायिक जीवन आरम्भ, सुधार गर्न सकिँदो रहेछ, वीरका चुनौतीपूर्ण ती दिन, फरक अवधारणाको अस्पताल, मुटु जोगाउने अभियान, गौरवपूर्ण गङ्गालाल हृदय केन्द्र, नाम्सको चपेटामा वीर अस्पताल, भिआइपीको उपचार, स्वास्थ्य र राजनीति शीर्षकमा विषयगत महत्वपूर्ण घटनासम्बन्धी लेख समेटिएको छ ।

चार सय ५२ पृष्ठको उक्त पुस्तकको मूल्य रु. ६ सय ७५ रहेको छ ।