नेपाल चिकित्सक संघद्धारा निजामती कर्मचारी अस्पतालमा चिकित्सक नियुक्तिमा तहगत घटुवा भएको भन्दै आपत्ति

जनस्वास्थ्य सरोकार, काठमाडौँ । नेपाल चिकित्सक संघले निजामती कर्मचारी अस्पतालमा चिकित्सक नियुक्तिमा तहगत घटुवा भएको भन्दै आपत्ति जनाएको छ ।

संघले सोमबार विज्ञप्ति जारी गर्दै अस्पतालले एमडी/ एमएस र एमडिएस चिकित्सकलाई तहगत रुपमा घटुवा गरेर आठौं तहमा कर्मचारी भर्ना गर्न लागिएको विषयमा आपत्ति जनाएको हो । अस्पतालले फागुन ३० गते स्थायी पदपूर्तिका लागि सूचना निकालेको थियो।

उक्त सूचनामा एमडी / एमएस र एमडिएस पास भइसकेका चिकित्सकलाई पनि मेडिकल अफिसरका रुपमा आठौं तहमा भर्ना गर्न खोजिएको छ। संघले उक्त कार्य कानुन विपरित रहेको समेत विज्ञप्तिमा उल्लेख गरेको छ।

‘स्वास्थ्य सेवा ऐन २०५३ र कार्यविधि २०५५ को दफा ८ को उपदफा १ को खण्ड च र छ बमोजिम खुला प्रतियोगिताद्वारा पूर्ति गरिने पदका लागि अनुसूची ६ मा उल्लेखित एमडीरएमएसरएमडिएस पश्चातका चिकित्सकहरुलाई ९औं र ११औं तह हुने नियमलाई लत्याउँदै विगत लामो समयदेखि स्थायी, अस्थायी करार र ज्यालादारीमा कार्यरत चिकित्सकहरुको स्थायीत्वमा असर पर्ने गरी छापिएको विज्ञापनमा एमडीरएमएसरएमडिएस चिकित्सकहरुलाई तहगत रुपमा घटुवा गरेर आठौं तहमा भर्ना खोल्ने प्रचलित कानुन विपरित भएको ठहर छ,’ विज्ञप्तिमा भनिएको छ।