नवनियुक्त उपप्रधानमन्त्री र मन्त्रीद्वारा पद तथा गोपनीयताको शपथ, स्वास्थ्य मन्त्रालय अझै मन्त्रीबिहीन

जनस्वास्थ्य सरोकार, काठमाडौँ । राष्ट्रपति रामचन्द्र पौडेलले नवनियुक्त उपप्रधानमन्त्री एवम् मन्त्रीलाई पद तथा गोपनीयताको शपथ गराउनुभएको छ ।

राष्ट्रपति कार्यालय शीतल निवासमा आयोजित विशेष समारोहमा राष्ट्रपति पौडेलले उपप्रधानमन्त्री एवम् मन्त्रीहरूलाई पद तथा गोपनीयताको शपथ गराउनुभएको हो ।

प्रधानमन्त्री दाहालले आज मन्त्रिपरिषद् विस्तार गर्नुभएको हो । प्रधानमन्त्री दाहालले नेपाली कांग्रेस, नेकपा (एकीकृत समाजवादी), जनता समाजवादी पार्टी, लोकतान्त्रिक समाजवादी पार्टी र नागरिक उन्मुक्ति पार्टीलाई समेटेर मन्त्रिपरिषद् पुनर्गठन गर्नुभएको हो ।

शपथ ग्रहण गर्नेहरूमा उपप्रधानमन्त्री तथा रक्षा मन्त्रीमा पूर्णबहादुर खड्का, अर्थमन्त्रीमा डा.प्रकाशशरण महत, उद्योग वाणिज्य तथा आपूर्ति मन्त्रीमा रमेश रिजाल र सहरी विकास मन्त्रीका रुपमा सीता गुरुङ हुनुहुन्छ ।

यस्तै, नेकपा (माओवादी केन्द्र)का शक्तिबहादुर बस्नेतले ऊर्जा, जलस्रोत तथा सिँचाइ मन्त्री, नेकपा (एकीकृत समाजवादी)का वेदुराम भुसालले कृषि तथा पशुपक्षी विकास मन्त्री र प्रकाश जवालाले भौतिक पूर्वाधार तथा यातायात व्यवस्था मन्त्रीमा शपथ लिनुभएको छ ।

यस्तै, जनता समाजवादी पार्टी नेपालका तर्फबाट शिक्षा, विज्ञान तथा प्रविधि मन्त्रीमा अशोक राई, लोकतान्त्रिक समाजवादी पार्टीका तर्फबाट शरतसिंह भण्डारी श्रम, रोजगार तथा सामाजिक सुरक्षा मन्त्री बन्नुभएको छ ।

यस्तै, नागरिक उन्मुक्ति पार्टीकी अध्यक्ष रञ्जिता श्रेष्ठ चौधरीले भूमि व्यवस्था, सहकारी तथा गरिबी निवारण मन्त्रीमा पद तथा गोपनीयताको शपथ लिनुभएको छ ।

यसैगरी, नेपाल समाजवादी पार्टीका महिन्द्रराय यादवले महिला, बालबालिका तथा ज्येष्ठ नागरिक मन्त्रीको रुपमा शपथ लिनुभएको छ ।
स्वास्थ्य मन्त्रालय भने अझै मन्त्रीबिहीन बनेको छ। स्वास्थ्य कांग्रेसको भागमा परेको पनि मन्त्री नियुक्ती हुन सकेको छैन।